१० असार २०८३, बुधबार
चीनका एक कार्टूनिस्टले जी६ मुलुकका सदस्यहरू चीनलाई दमन गर्न खोजेको भन्दै मजाक उडाउने कार्टून प्रकाशन गरेका छन् ।
द लास्ट जी७ शीर्षकको कार्टून बानतोनलाओआताङ नामक कलाकारले सिना वीबोमा गत साता आइतवार राखेका थिए । जिसस क्राइस्टको मृत्यु हुनुअघिको भोज द लास्ट सपरमा यो चित्र आधारित छ ।
जी७ शिखर सम्मेलनमार्फत अमेरिकाले चीनविरुद्ध साझेदारहरू जुटाउन खोजेको धेरैले अर्थ लगाएका थिए । जी७ असान्दर्भिक रहेको भन्ने अर्थमा कार्टूनिस्टले यसलाई द लास्ट जी७ नाम दिएका हुन् ।
चित्रमा विभिन्न नौ जनावर देखाइएका छन् । ती जनावरले टेबलमा रहेको चिनियाँ नक्साको केकलाई हेरिरहेको देखिन्छ । चित्रमा यस्ता शब्द राखिएका छन् : यसमार्फत हामी अझै पनि विश्वमा शासन चलाउन सक्छौं ।
प्रत्येक जनावरका विभिन्न भावभंगिमा देखिन्छन् ।
अमेरिकालाई प्रतिनिधित्व गर्ने चील बीचमा जिसस जस्तो गरी बसेको देखिन्छ जसलाई भोजको आयोजक देखाइएको छ । चीलको अगाडि नोट छाप्ने यन्त्र देखिन्छ र डलर पनि देखिन्छ । यन्त्रले ट्वाइलेट पेपरलाई डलरका रूपमा छापेको र डलरमा राखिएको संख्या दुई खर्बबाट ८ खर्बसम्म पुगेको देखिन्छ ।
चीलको चित्रले आक्रामक तथा कमजोर अमेरिका ऋण संकट तथा जातीय द्वन्द्वमा फसेको देखाएको छ ।
त्यससँगै खैरो ब्वाँसो छ जुन इटली हो । ब्वाँसोसँगै अकिता कुकुर छ जुन जापानको प्रतीक हो । त्यसले हरियो रेडियोधर्मी पानी अन्य पशुको गिलासमा राखेको देखिन्छ । फुकुशिमा आणविक भट्टीबाट प्रशान्त महासागरमा प्रदूषित पानी फ्याँक्न खोजेको संकेत दिएको छ ।
कुकुरसँगै कंगारू देखिन्छ जसले अमेरिकामा छापिएको डलरका लागि हात पसारिरहेको देखिन्छ ।
देब्रे कुनामा कालो चील छ जुन जर्मनीको प्रतीक हो । त्यस्तै कुखुरोमार्फत प्रतिनिधित्व हुने फ्रान्स चुपचाप बसेको देखिन्छ ।
दाहिनेतर्फ सिंह अर्थात् बेलायत र न्युट्रिया नामक मुुसो जस्तो प्रजातिमार्फत क्यानडालाई प्रतिनिधित्व गरिएको छ ।
हात्तीको चित्र पनि देखिन्छ र त्यो ड्रिप लगाएको रोगी जस्तो देखिन्छ ।
टेबलमुनि भ्यागुतोले डलर लिइरहेको देखिन्छ अनि टेबलमा ठोक्किनलाई उफ्रेको देखिन्छ । भ्यागुतोले ताइवानलाई प्रतिनिधित्व गरेको हो ।
