ज्येष्ठ नागरिक समाज माकलबारीले ज्येष्ठ नागरिक तथा बुहारीहरूलाई सम्मान गरेको छ । 

७० वर्ष नाघेका ज्येष्ठ नागरिक र एकल ससुरा वा सासुलाई माया ममताका साथ पालनपोषण गर्ने बुहारीहरूलाई समाजले शनिवार एक कार्यक्रमका बीच सम्मान गरेको हो ।

ज्येष्ठ नागरिक तथा पारिवारिक कर्तव्य निर्वाहमा अब्बल बुहारीहरूमा उत्साह जगाउन सम्मान कार्यक्रम गरिएको समाजका अध्यक्ष टेकनाथ अधिकारीले बताए । 

समाजको तर्फबाट गोकर्णेश्वर नगरपालिकाका मेयर सन्तोष चालिसेले ज्येष्ठ नागरिक तथा बुहारीहरूलाई दोसल्ला ओढाउनुका साथै सम्मानपत्र हस्तान्तरण गरेका थिए ।

सो अवसरमा ३० ज्येष्ठ नागरिक, ८ जना बुहारी र ज्येष्ठ नागरिकलाई सहयोग गर्ने ३ व्यक्तित्वलाई सम्मान गरिएको थियो । 

कार्यक्रममा मेयर चालिसेले नगरपालिकाका तर्फबाट ज्येष्ठ नागरिक समाजलाई वाद्ययन्त्र पनि हस्तान्तरण गरेका छन् ।

समाजले संस्कृति संरक्षणको उद्देश्यले आयोजना गर्ने भजन–कीर्तन कार्यक्रमलाई सघाउ पुगोस् भनेर नगरपालिकाले वाद्ययन्त्र उपलब्ध गराएको हो । 

नगरपालिकाले उपलब्ध गराएको वाद्ययन्त्रमा हार्मोनियम, तबला, मादल, खैंजडी लगायत छन् । मेयर चालिसेले समाजका अध्यक्ष अधिकारीलाई ती वाद्ययन्त्र हस्तान्तरण गरेका थिए । 

मेयर चालिसेले ज्येष्ठ नागरिक समाजका लागि कोठा पनि उपलब्ध गराउने वचन दिएका छन् ।

‘नगरपालिकाले ज्येष्ठ नागरिक समाजका लागि उपयुक्त ठाउँमा कोठा उपलब्ध गराउनेछ,’ कार्यक्रममा मेयर चालिसेले भने ।