काठमाडौं २३ जेठ– नेपाली कांग्रेस संसदीय दलका नेता तथा प्रधानमन्त्रीका एक्ला उम्मेदवार शेरबहादुर देउवाले तीन तहको निर्वाचन सम्पन्न गर्ने आफ्नो मुख्य प्राथमिता रहने बताएका छन् । आर्थिक विकास, पूर्वाधार निर्माण र छिमेकीसंगको सुमधुर सम्बन्ध आफ्नो प्राथमिकतामा रहेको उनले बताए ।
मंगलवार बसेको व्यबस्थापिका संसदको दोस्रो बैठकमा प्रधानमन्त्रीको उम्मेदवारी पेश गर्दै देउवाले दोस्रो चरणको स्थानीय तहको चुनाव तोकिएको समयमै गर्ने प्रतिबद्धता जनाएका हुन् ।
‘माघ ७ गतेभित्र प्रान्त र संघीय चुनाव गर्नुपर्ने प्रतिबद्धता छ,’ देउवाले भने, ‘मधेशी जनताको भावनाको कदर गरेर संशोधन प्रस्ताव दर्ता गरेका छौं । संविधानको सर्वस्वीकार्यता बढाउन लाग्छु ।’ आर्थिक विकास र समृद्धिको आवस्यकताका लागि राजनीतिक वातावरण हुन जरुरी रहेको उनले बताए ।
देउवाले नपालको स्वार्थ पूरागर्न छिमेकी संग सन्तुलित सम्बन्ध राख्ने बताए । ‘नेपालको विदेशनीति राष्ट्रिय स्वार्थलाई ध्यानमा राख्नु पर्छ । छिमेकीसंग सुमधुर सम्बन्ध राष्ट्रिय हितमा छ’ देउवाले भने, ‘चीन र भारतलाई सुमधुर सम्बन्ध राखेर दुवैको सहयोग लिनुपर्छ ।’
