०५ साउन २०८३, मंगलबार
लुम्बिनी प्रदेश सरकारकी भौतिक पूर्वाधार राज्यमन्त्री सुमन शर्मा रायमाझीले मन्त्री पदबाट राजीनामा दिएकी छन् ।
राज्यमन्त्री रायमाझीले मुख्यमन्त्री शंकर पोखरेलसमक्ष राजीनामा बुझाएकी हुन् ।
'तपाईं मुख्यमन्त्री रहेको प्रदेश सरकारमा म समेत मन्त्री भै कामकाजमा सहयोग गरी आएकोमा जनता समाजवादी पार्टी, नेपालको तपाईं नेतृत्वमा रहेको सरकारलाई समर्थन नरहेकाले मैले तपाईंको सरकारमा पार्टीको समर्थन र सहयोगविना यस प्रदेशको सरकारमा रही निरन्तरता दिन नसक्ने भएकाले नेपालको संविधानको धारा १६९ को २ (क) बमोजिम आजको मितिबाट लागू हुने गरी मैले मेरो मन्त्री पदबाट राजीनामा गरेको छु,' उनले मुख्यमन्त्रीलाई लेखेको पत्रमा भनिएको छ ।
राजीनामासँगै रायमाझी पार्टीको 'मूलधार' उपेन्द्र यादव पक्षमा फर्किएको दाबी नेता मोहम्मद इश्तियाक राईले गरेका छन् ।
'मा. राज्यमन्त्री सुमन शर्मा रायमाझीद्वारा मन्त्री पदबाट राजीनामा दिई अग्रगमनको पक्षमा लागि पार्टी मूलधारमा रहने घोषणा,' उनले ट्वीटरमा लेखेका छन् ।
मा. राज्यमंत्री सुमन शर्मा रायमांझी द्वारा मंत्री पद बाट राजीवामा दिई अग्रगमनको पछमा लागी पार्टी मूलधारा मा रहने घोषणा pic.twitter.com/pSBX7VXAot
— Mohammad Ishtiyaq Rayi (@IshtiyaqRayi) July 2, 2021
यससँगै शंकर पोखरेल नेतृत्वको लुम्बिनी प्रदेश सरकार प्रदेश सभामा अल्पमतमा परेको छ ।
८३ सदस्यीय लुम्बिनी प्रदेश सभामा एमालेका ३८ सदस्य छन् ।
रायमाझीसहित जसपाका ४ सांसदको समर्थनमा ४२ सांसद जुटाएर मुख्यमन्त्री पोखरेलले बहुमत पुर्याएका थिए ।
अब उनको समर्थनमा ४१ सांसद मात्र रहेको देखिएको छ ।
