१८ असार २०८३, बिहीबार
दैलेखका दर्जनभन्दा बढी वस्तीमा जंगली बँदेलको बथान छिरेर लगाइएको मकैबाली सखाप पार्न थालेपछि किसान चिन्तित भएका छन् । महाबु, भैरवी गाउँपालिका, दुल्लु नगरपालिका र नारायण नगरपालिकाका दर्जनभन्दा बढी वस्तीमा लगाइएको घोगा निस्कनै लागेको अवस्थामा रहेको मकैबालीमा बँदेलको बथान छिरेर सखाप पार्न थालेपछि किसान चिन्तित भएका हुन् ।
वस्ती नजिकैको जंगलबाट आउने गरेको बँदेलको बथानले मकैबाली सखाप पारेको नारायण नगरपालिका–२ का राजकुमार थापाले बताए । दिनभरि जंगलमा बस्ने र रात परेपछि बारीमा आएर खेती तहसनहस बनाउने गरेको उनको भनाइ छ ।
बर्सेनि बँदेलले बाली नोक्सानी गरेपछि यसबारेमा पटकपटक सरोकारवाला निकायमा जानकारी गराउँदा पनि कुनै सुनुवाइ नभएको उनले गुनासो गरे।
कति किसान त मकै जोगाउन बारीमै रातभर जाग्रामसमेत बस्ने गरेको भैरवी-१ का गगन योगी बताउँछन् । बँदेलले मकैबाली मात्रै होइन, घैया र धानबाली पनि नष्ट गर्ने गरेको उनको भनाइ छ ।
पीडित किसानको क्षति विवरणको लगत संकलन गरिने र केही राहतका लागि सिफारिस गरिने भैरवी गाउँपालिकाका प्रमुख प्रेमबहादुर बुढाले जानकारी दिए ।
