२६ जेठ २०८३, मंगलबार
राष्ट्रिय तथा अन्तर्राष्ट्रिय खेलाडीको स्वास्थ्य उपचारका सम्बन्धमा राष्ट्रिय खेलकूद परिषद् (राखेप) र राष्ट्रिय ट्रमा सेन्टरबीच सम्झौता भएको छ ।
राष्ट्रिय तथा अन्तर्राष्ट्रिय खेलाडीको प्रभावकारी औषधि उपचार गर्ने/गराउने सम्बन्धमा नेपाल खेलकुद महासंघ (नेकोस) को विशेष पहलमा सम्झौता भएको हो ।
राखेपका सदस्य–सचिव रमेशकुमार सिलवाल र ट्रमा सेन्टरका निमित्त प्रमुख मेडिकल सुपरिन्टेन्डेन्ट डा. सन्तोष पौडेलले त्रिपुरेश्वरस्थित राखेपको खेलकुद चिकित्सा तथा अनुसन्धान केन्द्रमा भएको एक कार्यक्रमबीच सम्झौतापत्रमा हस्ताक्षर गरे ।
सम्झौताअनुसार ट्रमा सेन्टरले खेलाडीका लागि २४ सै घण्टा इमर्जेन्सी, रक्तसञ्चार, फार्मेसी, रेडियोलोजी/इमेजिङ सेवा (सीटी, डेक्सा स्केन, युएसजी, एक्सरे आदि), प्याथोलोजी ल्याब, शल्यक्रिया सेवा (विभिन्न विषयका), अर्थोपेडिक तथा ट्रमा सर्जरी (हाडजोर्नी, स्पाइनल, जोर्नी प्रत्यारोपण) सेवा उपलब्ध गराउने छ ।
स्पोर्ट्स इन्जुरी तथा आर्थोस्कोपी सर्जरीलगायत), न्युरो सर्जरी (बहिरङ/अन्तरङग), इएनटी (बहिरङ/अन्तरङ्ग), वर्न प्लास्टिक, जनरल सर्जरी, ओरल एन्ड मेक्जिलो फेसियल, भास्कुलर सर्जरी (अन्तरङ्गा), सघन उपचार र फिजियोथेरापीलगायत ट्रमा सेन्टरबाट उपलब्ध हुने सम्पूर्ण स्वास्थ्य सेवा तथा सामाजिक सेवा एकाइमार्फत औचित्य हेरी सहुलियतपूर्ण तबरले ट्रमा सेन्टरले उपलब्ध गराउने छ ।
ट्रमा सेन्टरमा उपलब्ध नभएका सेवा तथा औषधि, औषधिजन्य सामग्री र शल्यक्रियाजन्य सामग्री तत्कालका लागि बिरामी स्वयंले व्यवस्था गर्नु/गराउनुपर्ने तथा त्यसरी प्रयोग भएका सेवा र सामग्रीको भुक्तानी ट्रमा सेन्टरको सिफारिसका आधारमा बिरामीले राखेपसँग शोधभर्नाका लागि पेश गर्न सक्नेछ । खेलाडीको प्रभावकारी उपचारमा सहजीकरण गर्नका लागि दुवै पक्षबाट आ–आफ्नो फोकल पर्सन तोक्नुपर्नेछ ।
