२३ जेठ २०८३, शनिबार
काठमाडौंको पशुपति क्षेत्रका खाली स्थानमा औषधीय गुणले युक्त वनस्पति गुर्जो रोप्ने अभियानअन्तर्गत वनकाली क्षेत्रको उद्यानमा १०० गुर्जोका बिरुवा रोपिएको छ ।
मानव शरीरमा रोग प्रतिरोधी क्षमता वृद्धि गर्ने गुर्जोको प्रवद्र्धनमा लागेका आन्तरिक राजस्व कार्यालय धुलिखेलका कार्यालय प्रमुख कमलबहादुर राजलवटका नेतृत्वमा शुक्रवार गुर्जोका बिरुवा रोपिएको हो ।
कार्यक्रममा पूर्व प्रधानसेनापति रुक्माङ्गद कटवाल, पूर्व सहसचिव एवं योग शिक्षक किशोरकुमार जोशी, अधिकारसम्पन्न बागमती सभ्यता एकीकृत विकास समितिका सञ्चालक सदस्य डा. माला खरेल, अभियानकर्मी राजलवट लगायतले गुर्जो रोपण गरेका थिए ।
नयाँ भेरियन्ट सहितको कोरोना महामारी फैलिएपछि राजलवटले रोग प्रतिरोधी क्षमता वृद्धि गर्ने गुर्जोबाट बनेको चिया र धुलो ३६ जिल्लाका १२१ केन्द्रबाट निःशुल्क वितरणको व्यवस्था मिलाएका थिए ।
विक्रम संवत् २०७६ चैतमा कोरोनाबाट बच्न बन्दाबन्दी जारी गरेदेखि नै उनले गुर्जोका बिरुवा र यसबाट बनेको चिया र धुलो निःशुल्क वितरण गर्दै आएका थिए । एक घरमा एक गुर्जोको बिरुवा हुर्काएर विभिन्न रोगबाट बच्ने शक्तिका लागि औषधि बनाउन सकिने राजलवटको विश्वास छ ।
