१० असार २०८३, बुधबार
पाकिस्तानको माथिल्लो कोहिस्तानमा यसै साता भएको बस विस्फोटमा नौजना चिनियाँ मारिएको घटना आतंकवादीहरूले गराएको पुष्टि भएपछि चीनका प्रधानमन्त्री ली खछ्याङले पाकिस्तानी समकक्षी इमरान खानलाई फोन गरेका छन् ।
लीले खानलाई यथाशीघ्र पीडकहरूलाई न्यायको कठघरामा उभ्याउन भनेका छन् ।
यसअघि पाकिस्तानले बसमा ग्यास चुहिएर विस्फोट भएको भन्दै आएको भए पनि पाकिस्तानका सूचनामन्त्री फवाद चौधरीले बिहीवार बसमा विस्फोटक पदार्थहरूको निशान भेटिएको बताए । आतंकवादीहरूले घटना गराएको कुरालाई अस्वीकार गर्न नमिल्ने उनको भनाइ छ ।
इस्लामाबादले यो आतंकवादी घटना नभएको भनी शुरूमा भन्दा बेइजिङले त्यसको कठोर प्रतिकार गर्दै यो बम आक्रमण भएको बताएको थियो । पीडकलाई सजायको माग गर्दै चिनियाँ कामदार, संस्था र परियोजनाको सुरक्षा गर्न पनि चीनले माग गरेको छ ।
बसमा विस्फोट हुँदा नौजना चिनियाँ सहित १३ जनाको ज्यान गएको थियो । बसले कामदारहरूलाई ४३ सय मेगावाटको दासु जलविद्युत् परियोजना क्षेत्रमा लगिरहेको थियो ।
