काठमाडौं २६ जेठ–राष्ट्रिय जनमोर्चाका अध्यक्ष चित्रबहादुर केसीले राम्रो काम गरेमात्र प्रधानमन्त्री शेरबहादुर देउवा नेतृत्वको सरकारलाई समर्थन गर्ने बताएका छन् । उनले देउवालाई पटक पटक व्यहोरिसकेको भन्दै उनका अगाडि चुनौती रहेको बताए ।
‘माघ गए, फागुन गए खवरी नपाए भने जस्तो मध्यबर्खामा चुनाव सारिएको छ’ केसीले शुक्रवार संसद्मा नवनिर्वाचित प्रधानमनत्रीलाई शुभकामना दिँदै भने, ‘देउवाजी नयाँ मान्छे हुनुहुन्न, देखिसकेका छौ, व्यहोरी सकेका छौ । तीन तहको चुनाव गराउन कठिन छ ।’
गणतन्त्रमा दश बर्षमा दशजना प्रधानमन्त्री बनाउन सफल भएका छौं भन्दै केसीले संसदमा व्यग्य गरे । मधेस केन्द्रित दललाई सहमत गराउन भन्दै निर्वाचन कानूनमा संशोधन गरिएपनि जसको लागि संशोधन गर्र्यो, उनीहरुले खुलेआम चुनवामा भाग नलिने बताएको बताए ।
केसीले देउवाको विपक्षमा भोट हालेपनि आफ्नो पार्टीले सरकारको राम्रो कामलाई समर्थन गर्ने बताए । ‘कुरा जस्ता कुरा गरौ भने चित्त फाट्ने होला ? देउवाजीलाई हामीले भोट दिएनौ, असहमति रह्यो’ केसीले भने, ‘राम्रा कामका लागि कांग्रेससंग कार्यगत एकता गरेका छौ । प्रतिपक्षको भूमिका राम्रो गर्दा समर्थन गर्ने, गलत कामको विरोध गर्ने हो त्यही गछौं ।’
