१५ असार २०८३, सोमबार
जनता समाजवादी पार्टी (जसपा) को आधिकारिकता विवादबारे निर्णय गर्न आइतवार निर्वाचन आयोगमा इजलास बस्दै छ ।
इजलास बिहान ११ बजे बस्ने आयोगका प्रवक्ता राजकुमार श्रेष्ठले जानकारी दिए ।
पक्ष विपक्षको बहस सकिएपछि आधिकारिकता विवादबारे आयोगले निर्णय गर्ने उनको भनाइ छ । बहस केही दिन लम्बिन सक्ने पनि उनले बताए ।
विवाद निरुपणका लागि गत असार २३ गते प्रमुख निर्वाचन आयुक्त दिनेशकुमार थपलियाको नेतृत्वमा पाँच सदस्यीय इजलास गठन गरिएको थियो ।
अध्यक्षद्वय महन्थ ठाकुर र उपेन्द्र यादव पक्षले एक अर्कालाई कारबाही गर्दै दुवैले आफूहरू आधिकारिक भएको दाबी गर्दै आएका छन् ।
यसअघि ३२ सांसदमध्ये उपेन्द्र पक्षसँग १२ मात्रै सांसद थिए । तर, अहिले उपेन्द्र पक्षले आफूसँग १९ जना सांसद रहेको दाबी गरेको छ ।
