लद्दाखको गलवान उपत्यकामा पोहोर साल भएको हिंस्रक संघर्षमा मारिने सैनिकहरूको वीरगाथा प्रकाशन गरेको छ ।

चन होङजुन नामक सैनिकको वीरतालाई चीनको सरकारी सञ्चारमाध्यममा वर्णन गरिएको छ । 

चिनियाँ सरकारी समाचार संस्था सिन्ह्वालाई उद्धृत गर्दै ग्लोबल टाइम्सले ३३ वर्षीय बटालियन कमान्डर चनले सीमामा ड्युटी निर्वाह गर्ने क्रममा आफ्ना अन्य तीन साथीसँगै ज्यान गुमाएको खबर दिएको छ । 

ती सैनिकहरू सिन्ज्याङ मिलिटरी कमान्ड अन्तर्गत तैनाथ थिए र काराकोरमको पहाडमा खटिएर सीमा सुरक्षा गरिरहेका थिए । 

चीन मामिलाविद् तथा अस्ट्रेलियन स्ट्राटेजिक पोलिसी इन्स्टिच्युटका अनुसन्धाता नेथन रुसरले झडप भएको ठाउँ भारतीय सीमाको ५० मिटर भित्र रहेको जियोलोकेटरबाट पत्ता लाग्ने बताएका छन् । 

त्यो दाबी यदि सही हो भने भारत सीमामा प्रवेश गरेर चीनले आक्रमण गरेको पुष्टि हुन्छ । आफ्नो सीमामा प्रवेश गरेको चिनियाँ सेनालाई त्यहाँबाट हटाउन भारतीय सेना जाँदा रातको समयमा भिडन्त भएको हो । 

ग्लोबल टाइम्सले चन होङजुनका बारेमा लेख्यो, ‘लडाइँको बेलामा रेजिमेन्टल कमान्डर की फाबाओलाई भारतीय सैनिकहरूले घेराबन्दी गर्दा चन आफ्ना सैनिकहरूका साथ अघि बढेका थिए । भारतीय जवानहरूसँग लट्ठी र ढुंगाका साथ लडाइँ गर्न उनी अघि बढेका हुन् । चनले आफ्नो शरीरलाई ढाल बनाएर कमान्डरलाई बचाए । अन्य चिनियाँ सैनिकहरू पनि घेराबन्दीमा परेको देखेपछि चन फेरि लडाइँमा होमिए ।’

यस संघर्षमा २० जना भारतीय सैनिक मारिएका थिए । तीमध्ये अधिकांशको मृत्यु चिसो पानीमा खसेर भएको थियो । 

*यसअघि गलवानमा मर्ने सैनिकको संख्या थप्यो चीनले शीर्षकमा छापिएको खबर ग्लोबल टाइम्समा छापिएको खबरका आधारमा बनाइएको थियो । त्यसमा गलवान भिडन्तमा पाँचजना चिनियाँ सैनिक मारिएको उल्लेख थियो । तर ग्लोबल टाइम्सले त्यो खबर छापेको भोलिपल्ट भूलसुधार गर्दै गलवानमा चारजना मात्र चिनियाँ सैनिक मारिएको स्पष्ट पारेको छ । त्यसैले लोकान्तरले पनि भूलसुधार गर्दै शीर्षक र लीड सच्याएको छ । पाठकहरूलाई पर्न गएको असुविधका लागि हामी क्षमाप्रार्थी छौं ।