०५ असार २०८३, शुक्रबार
बलिउड अभिनेत्री शिल्पा शेट्टीका व्यापारी पति राज कुन्द्रालाई शुक्रवारसम्मका लागि प्रहरी हिरासत पठाइएको छ ।
उनलाई पोर्न फिल्म बनाएको र यापमार्फत त्यसको प्रसारण गरेको आरोपमा सोमवार राति पक्राउ गरिएको हो ।
कुन्द्रासहित कम्तीमा ११ जनालाई अश्लील फिल्म उत्पादनको मुद्दामा पक्राउ गरिएको हो । उनको पक्राउसँगै बलिउडको कालो संसार उजागर भएको छ ।
जी न्युजले कुन्द्राको बैंक खाताको एक्सक्लुसिभ विवरण प्राप्त गरेको छ । उनले हटशट्स यापमार्फत दिनकै लाखौं रुपैयाँ गरी करोडौं कमाएको बैंक खातामार्फत पत्ता लागेको छ ।
उनको कम्पनीले यही यापमार्फत बैंकमा करोडौं रुपैयाँ सारेको पाइएको छ ।
कुन्द्रालाई भारतीय दण्ड संहिताका दफा ४२०, ३४, २९२ र २९३ अनि सूचना प्रविधि ऐन तथा महिलाको अभद्र प्रस्तुति (प्रतिबन्ध) ऐनअन्तर्गत पक्राउ गरेर हिरासतमा लिइएको हो ।
कुन्द्राको भियान इन्डस्ट्रीजले लन्डनमा रहेको केनरिन नामक कम्पनीसँग सम्बन्ध गाँसेको थियो । केनरिनले नै हटशट्स याप बनाएको हो र त्यसमा पोर्न फिल्महरू राख्ने गरिएको थियो ।
‘केनरिन लन्डनमा दर्ता गरिएको कम्पनी भए पनि त्यसको सामग्री उत्पादन, याप सञ्चालन र लेखापढीको काम कुन्द्राको भियान इन्डस्ट्रीजले गरेको देखिन्छ,’ जोइन्ट कमिस्नर अफ पुलिस मिलिन्द भाराम्बेले बताए ।
केनरिनको स्वामित्व कुन्द्राका बहिनी ज्वाइँसँग छ ।
प्रहरीले यी दुई कम्पनीको सम्बन्ध देखाउने प्रमाणहरू फेला पारेको छ । उनीहरूको ह्वाट्याप ग्रूप, इमेल आदानप्रदान, अकाउन्ट डिटेल र केही पोर्न फिल्म समेत कुन्द्राको मुम्बईस्थित कार्यालयमा प्रहरीले फेला पारेको हो ।
भाराम्बेले बताए, ‘यस मुद्दामा फौजदारी प्रमाण संकलन गर्ने क्रममा हामीले राज कुन्द्रा र उनका आईटी प्रमुख रायन थोर्पलाई पक्राउ गरेका हौं । केसमा अनुसन्धान जारी छ ।’
