राष्ट्रिय सभा सदस्य रामनारायण बिडारीले प्रतिपक्षी दल नेकपा एमालेले बाँदरे जुलुस निकालेर कोरोनाको रोपाइँ गरेको आरोप लगाएका छन् ।

राष्ट्रिय सभाको बिहीवारको बैठकमा बोल्दै बिडारीले कोरोना संक्रमण फैलाउने गरी जुलुस प्रदर्शन गरिएको आरोप लगाएका हुन् ।

केही दिनअघि एमालेको युवा संघले बानेश्वरमा बाँदरको भेषमा जुलुस निकालेको थियो ।

साथै उनले वर्तमान सरकारले किसान र मजदुरको हितमा काम गर्नुपर्ने पनि बताए ।​

‘इन्साफे व्यवस्थाको निम्ति, विकासे व्यवस्थाको निम्ति, फलाउने किसान, बनाउने मजदुरहरूको हित र कल्याणको निम्ति, किसान र मजदुरको हित र कल्याण भयो भने करीब-करीब ९० प्रतिशत जनताको हित हुन्छ । ती किसान, मजदुरलाई नेपालमा काम गर्न दिन नसकेर विदेश निर्यात गर्ने यस प्रकारको चलन अगाडीको सरकारले गरे । अब यो सरकारले त्यस प्रकारको कदमलाई सच्याएर इन्साफे, विकासे व्यवस्था गरौँ । यही शुभकामना छ । नत्र फेरि मुलुकले दुःख पाउँछ ।’

उनले विगतको सरकारले नेपाली नागरिकलाई रैती बनाएको पनि बताए । नेपाली नागरिकलाई नागरिकता, लालपूर्जा र सिफारिशमा अड्काएको उनको आरोप छ ।

‘विगतका जम्मै सरकारले रैती बनाउन खोजे । जनता बनाउन दिएन । कहिले लालपूर्जा अड्काइदिन्छ । कहिले नागरिकता अड्काइदिन्छ । कहिले सिफारिश अड्काइदिन्छ । कहिले सुविधा दिन्छु भनेर नदिएर अड्काइदिन्छ । कहिले अधिकार खोसेर जनतालाई आफ्नो वशमा राखिरहन्छ । नियन्त्रणमा राखिराख्छ,’ बिडारीले भने ।

आजसम्मका सरकारले भूमिहीनलाई नागरिकता नदिएर सुकुम्बासी खेती गरिरहेको पनि बिडारीले बताए । भूमिसम्बन्धी समस्या समाधानमा सरकारले ध्यान दिनुपर्नेमा उनको जोड छ ।

प्रतिनिधि सभा पुनःस्थापनाको सन्दर्भमा सर्वोच्च अदालतको फैसला संसारको लागि नमुना लायक भएको भन्दै यस नजिरलाई विश्वले नमूना बनाउने उनले जिकिर गरे ।

उनले भने – ‘अहिलेको अदालतको व्याख्या संसारलाई नमूना लायक छ । हामी अमेरिकाको संविधान, बेलायतको संविधान, भारत, पाकिस्तानको संविधानको नजिरहरु यहाँ पढ्दै थियौँ । अब बेलायतले नेपालको नजिर पढ्दैछ । अब संसदीय प्रणालीमा यो नजीरहरूको व्याख्या हुन्छ । र त्यसलाई साभार गरिन्छ । विश्वका अरु देशले यसलाई नमूना बनाउँछन् ।’