निर्वाचन आयोगले पार्टी आधिकारिकताको जाँचका लागि जनता समाजवादी पार्टी (जसपा)का केन्द्रीय कार्यकारिणी सदस्यलाई शशरीर शरीर उपस्थित हुन निर्देशन दिएको छ । 

बिहीवार आयोगको इजलासमा भएको सुनुवाइ पछि आयोगले साउन ११ गते ११ बजे कार्यकारिणी समितिका ५१ जनालाई निर्वाचन आयोगमा बोलाइएको हो । आयोगले सनाखत गर्नका लागि नागरिकता सहित उपस्थित हुने निर्देशन दिएको प्रवक्ता राजकुमार श्रेष्ठले लोकान्तरलाई जानकारी दिए । 

प्रतिनिधि सभा विघटन र सरकारमा सहभागिताको विषयलाई लिएर विवाद भएपछि जसपाको दुवै पक्षले एक अर्कोलाई कार्वाही गरेको थियो । आयोगले दुवै पक्षको कारवाहीलाई वैद्यता दिन अस्वीकार गर्दै बोलाएको थियो । 

अध्यक्ष उपेन्द्र यादव पक्षले आफूहरु मिल्न नसक्ने भएकोले प्रक्रियामा गएर विवाद टुंगाउन आयोगसँग आग्रह गरेको थियो । सोही अनुसार आयोगले इजलास गठन गरेर सुनुवाइ गरेको थियो । 

उपेन्द्र पक्षमा नेता मोहम्मद इश्तियाक राईले जसपा एकता भएको बखतको कार्यकारिणी सदस्यलाई आयोगले बोलाएको जानकारी दिए । नागरिकता सहित सनाखत गरेपनि आयोग निर्णयमा पुग्ने छ ।