नेकपा माओवादी केन्द्रले प्रधानमन्त्री शेरबहादुर देउवालाई स्व. गिरिजाप्रसाद कोइरालालाई जस्तै छवि बनाउने अवसर रहेको बताएको छ । 

शुक्रवार बसेको प्रतिनिधि सभा बैठकमा देउवालाई बधाई दिँदै माओवादी स्थायी कमिटी सदस्य हरिबोल गजुरेलले अनुभव र परिपक्वताका कारण प्रधानमन्त्री देउवालाई नयाँ इतिहास रच्ने अवसर रहेको बताएका हुन् । 

‘विगतमा गिरिजाप्रसाद कोइरालामाथि धेरै प्रश्न उठे, जब प्रजातन्त्र संकटमा पर्यो त्यसपछि उहाँले माओवादी र सात दलको सहकार्यबाट सहमति गरेर संविधानसभाको चुनाव गराउनु भयो । चुनावमा हार्ने जान्दाजान्दै संविधानसभाको चुनाव गराउनु भयो,’ गजुरेलले भने, ‘देउवाज्यूलाई प्रधानमन्त्रीको रुपमा एउटा अवसर आएको छ, अनुभव र उमेरको हिसाबले पाको हुनुहुन्छ । गिरिजाले जुन छवि बनाउनु भयो अहिले प्रधानमन्त्रीज्यूलाई अवसर छ ।’

प्रधानमन्त्री देउवाबाट सुशासन र भ्रष्टाचारमुक्त समाजको अपेक्षा जनताले गरेको गजुरेलले बताए । उनले पटक–पटक विघटन गरिएको प्रतिनिधि सभा पुनःस्थापना गरेर सर्वोच्च अदालतले संविधानलाई जीवित तुल्याइदिएको बताए ।