०२ साउन २०८३, शनिबार
लुम्बिनी प्रदेश सभाकी जनता समाजवादी पार्टी (जसपा) उपेन्द्र यादव पक्षीय सांसद पुर्मती ढेंगा सम्पर्क विहीन भएकी छन् ।
जसपाले सांसद ढेंगा आइतबार बिहान ११ बजेदेखि बेपत्ता भएको भन्दै इलाका प्रहरी कार्यालय, बुटवलमा उजुरी दिएको छ । जसपाले सत्तापक्षले सम्पर्कविहीन बनाएको आरोप लगाएको छ ।
जसपाका प्रदेश अध्यक्ष अशोक यादवले आइतबार बिहानदेखि सांसद ढेंगा सम्पर्कविहीन भएको बताए ।
उनले लोकान्तरसँग भने, ‘फोन गर्दा घन्टी जान्छ फोन उठ्दैन । घरमा जाँदा घरमा छोराले आमाको फोन उठ्दैन बाबाको मोबाइल अफ छ भन्छन । प्रदेशमा सरकार बनाउने गरे गिराउने खेल चलिरहेको छ । सत्तापक्ष उहाँलाई सम्पर्कविहीन बनाउने खेलमा त, लागेन भन्ने हामीलाई आशंका हो ।’
पाल्पाकी ढेगा जसपाकी समानुपातिक सांसद हुन । ६ जना सांसद प्रदेश सभा रहेको जसपाका यस अगाडि महन्त ठाकुर चार जना मन्त्री बनेका थिए ।
त्यसमध्येकी भौतिक पूर्वाधार राज्यमन्त्री सुमन शर्मा रायमाझीले राजीनामा दिएर यादव पक्षमा लागेकी छन् ।
एमाले लुम्बिनी प्रदेश सभाका प्रमुख सचेतक भूमिश्वर ढकालले आफूहरुलाई जसपाले झुट्टा आरोप लगाएको बताए । ‘उहाँहरुले हामीलाई सांसदलाई सम्पर्कविहीन बनाएको भन्ने आरोप खेदजनक र आपत्तिजनक छ ।’ ढकालले लोकान्तरसँग भने ।
उनी शुरूदेखि यादव पक्षमा लागेकी थिइन । इलाका प्रहरी कार्यालय बुटवलका डिएसपी मदन कुँवरले सांसद सम्पर्कविहीन भएको सूचनापछि खोजी जारी रहेको बताए ।
उनले भने, ‘हामी खोजी जारी छ । सबै ठाउँमा सोधखोज गरिरहेका छौं ।’ अहिले लुम्बिनीका मुख्यमन्त्री शंकर पोखरेल अल्पमतमा छन् ।
ढेंगालाई सम्पर्क गर्दा उनको फोन उठेन ।
