०४ असार २०८३, बिहीबार
काठमाडौंको बूढानीलकण्ठ नगरपालिकाले नागरिकको सुविधाका लागि वडावडामै कोरोना विरुद्धको खोप उपलब्ध गराउने भएको छ ।
यसअघि नगरभित्र २ ठाउँमा खोप केन्द्र राखिएकामा नगरपालिकाले अब १३ वटै वडाबाट खोप लगाउने तयारी गरेको हो ।
कोरोना संक्रमणको जोखिम बढिरहेको र निश्चित ठाउँमा मात्रै खोप केन्द्र राख्दा नागरिकले कष्ट व्यहोर्नुपरेको गुनासो आएकाले नगर भित्रका सबै वडामा खोप केन्द्र सञ्चालन गर्ने तयारी गरिएको नगरपालिकाका जनस्वास्थ्य महाशाखा प्रमुख कुमारप्रसाद दाहालले बताए ।
तोकिएको उमेर समूहका भन्दा पनि अन्य मानिस खोप केन्द्रमा उपस्थित हुँदा व्यवस्थापनमा साह्रै समस्या भयो । भीडभाड पनि बढी भएकाले संक्रमणको जोखिम कम गर्दै नागरिकको सेवा र सन्तुष्टि बढाउन वडामै खोप लैजाने तयारी गरिएको उनको भनाइ थियो ।
मंगलवारदेखि नै ४५–४९ उमेर समूहलाई चाइनिज भेरोसेल (पहिलो मात्रा) लगाउन थालिएको नगर प्रमुख उद्धबप्रसाद खरेलले बताए । उनले भने, ‘माग अनुसार एकै पटक त सक्ने अवस्था नभए पनि सबै नागरिकलाई खोप उपलब्ध गराउने र संक्रमणबाट बचाउने अभियानमा हामी छौं ।’
