नेपाल राष्ट्र बैंकले सोमवार जारी गरेको एकीकृत निर्देशिकाको असर वाणिज्य बैंक तथा लघुवित्त संस्थाको शेयरमा परे पनि नेप्से परिसूचक हालसम्मकै उच्च विन्दुमा पुगेको छ ।

मंगलवारको कारोबारपछि नेप्सेले नयाँ उचाइ कायम गरेको छ ।

बजार पूँजीकरण पनि हालसम्मकै उच्च विन्दुमा पुगेको छ । नेपाल स्टक एक्सचेञ्जका अनुसार मंगलवारको कारोबारपछि बजार पूँजीकरण ४२ खर्ब ८३ अर्ब ९४ करोड ३२ लाख ३० हजार बराबर पुगेको छ ।

बजार पूँजीकरण नेपालको कूल गार्हस्थ्य उत्पादन (जीडीपी) भन्दा धेरै माथि पुगेको छ । लगानीकर्ताको ध्यान मंगलवार विशेष गरी जीवन बीमा, उत्पादन, निर्जीवन बीमा र जलविद्युत् उपसमूहको शेयरमा परेको नेप्सेको विवरणबाट देखिन्छ ।

नेपाल स्टक एक्सचेञ्जका अनुसार नेप्से २९.२४ विन्दुले बढेर ३ हजार ७९.६७ मा पुगेको छ । यो हालसम्मकै उच्च विन्दु भएको हो । ठूला कम्पनीको शेयर कारोवार मापन गर्ने सेन्सेटिभ परिसूचक ३.१९ विन्दुले बढेर ५७४.३० मा पुगेको छ ।

कूल २२५ कम्पनीको ३ करोड २३ लाख ५५ हजार २६० कित्ता शेयर १५ अर्ब १७ करोड ६ लाख ५१ हजार ६४३ मूल्यमा खरिद बिक्री भए ।

कारोबार भएका १३ उपसमूहमध्ये ४ उपसमूहको शेयर मूल्य ओरालो लागेको छ भने ९ उपसमूहको शेयरमा वृद्धि भएको छ । केन्द्रीय बैंकले सोमवार बैंक तथा लघुवित्त संस्थाको लाभांश वितरणमा कडाइ गर्ने निर्देशिका जारी गरेपछि बैंकिङ २.६३ र लघुवित्त उपसमूहको शेयर ११६.६६ विन्दुले घटेको छ । व्यापार २.५७ र होटल तथा पर्यटन १८.७७ बिन्दुले ओरालो लागेको छ ।

विकास बैंक ३५.५७, जलविद्युत् ११९, वित्त ७१.०४, निर्जीवन बीमा १२०.२६, उत्पादन ३०५.१८, अन्य ६०.३४, जीवन बीमा २६०.०८, सामूहिक लगानी कोष ०.१३ र लगानी उपसमूहको शेयरमा ३.०५ विन्दुले बढेको छ । कारोबारका आधारमा एनआईसी एसिया बैंक शीर्ष स्थानमा रहेको छ ।

बैंकको ४९ करोड १५ लाख ५० हजार ७५५ बराबरको कारोबार भयो । अपिपावर कम्पनी ४८ करोड ३२ लाख १ हजार ४१४, युनाइटेड मोदी ३६ करोड २४ लाख ४० हजार ५३०, सानिमा माई हाइड्रोपावर ३५ करोड २८ लाख ५७ हजार ४९७ र नेशनल हाइड्रोपावर ३४ करोड ७७ लाख ८ हजार ५७० बराबरको कारोवार भई शीर्ष स्थानमा रहे ।

नेप्सेका अनुसार मल्टिप्रपोज फाइनान्स, खानीखोला हाइड्रोपावर, युनाइटेड मोदी, नेपाल हाइड्रो डेभलपर, जोशी हाइड्रो पावर घलेम्दी हाइड्रोपावर, हिमालयन ऊर्जा विकास कम्पनी, जानकी फाइनान्स र युनिभर्सल पावरको शेयरमा सकारात्मक सर्किट लागेको छ । ती कम्पनीको शेयरमा १० प्रतिशतले वृद्धि भई सकारात्मक सर्किट लागेको हो ।

सपोर्ट माइक्रोफाइनान्स ५.७७, उन्नति सहकार्य लघुवित्त ४.६८, जनउत्थान सामुदायिक लघुवित्त ४.०६, स्वाभिमान लघुवित्त ३.९६ र समता घरेलु लघुवित्तका लगानीकर्ताले ३.८१ प्रतिशतले गुमाए ।