जिल्ला प्रहरी कार्यालय धनुषाको हिरासत कक्षमा एक जना थुनुवाले आत्महत्या गरेका छन् । 

ज्यान मार्ने उद्योग तथा अंगभंग मुद्दामा असार १४ गते पक्राउ परेका धनुषाको लक्ष्मीनिया गाउँपालिका-२ का ४० वर्षीय पल्टु रवी दासले आत्महत्या गरेका हुन् ।

जिल्ला प्रहरी कार्यालय धनुषाका प्रहरी उपरीक्षक प्रकाश रानाभाटका अनुसार शुक्रवार बिहान साढे ३ बजे शौचालयमा झुण्डिएको अवस्थामा शव फेला परेको हो ।  

घटनाको विस्तृत अनुसन्धान हुन बाँकी रहेकाले थप विवरण अहिले दिन नसकिएको उनले बताए । 

धनुषा जिल्ला अदालतबाट दुई लाख धरौटी माग भएको र सो रकम तिर्न नसकेको कारण थुनामा राख्न कारागार कार्यालय सिन्धुली पठाउन आदेश दिइएको थियो ।

थुनुवालाई कारागारमा बुझाउने प्रयोजनको लागि हिरासतमा राखिएकै अवस्थामा पल्टुले झुन्डिएर आत्महत्या गरेको प्रहरीले जनाएको छ ।