२८ जेठ २०८३, बिहीबार
असोजबाट कात्तिकका लागि सारिएको सहिद स्मारक ‘ए’ डिभिजन लिगको विजेताले ७५ लाख नगद पुरस्कार प्राप्त गर्ने भएको छ ।
अखिल नेपाल फुटबल संघ (एन्फा) ले आइतवार डिभिजन लिगको विजेताले ७५ लाख पाउने बताएको हो ।
एन्फाले यसपटक पुरस्कार राशिमा वृद्धि गरेर ७५ लाख पुर्याएको हो । यसअघिको सिजनमा च्याम्पियनले ५० लाख रूपैयाँ प्राप्त गरेको थियो । नयाँ सिजनको लिगको उपविजेताले ५० लाख प्राप्त गर्दा तेस्रोले २५ लाख पाउने एन्फाले जनाएको छ ।
यस्तै एन्फाले क्लबलाई तयारी खर्चको लागि २०–२० लाख समेत उपलब्ध गराउने छ ।
यस्तै अखिल नेपाल फुटबल संघ (एन्फा) ले लिग शुरू हुने मिति पछि सारेको छ ।
परिवर्तन गरिएको तालिकाअनुसार लिग आगामी कात्तिक २९ गतेबाट हुनेछ । ‘ए’ डिभिजनका १४ क्लबसँग छलफल गर्दै लिगको नयाँ मिति तय गरेको हो ।
सोही छलफलबाट सहभागी क्लब लिग खेल्न सहमति भएको जनाएको हो । यसअघि ललितपुरका चार क्लबले महामारीलाई कारण दिएर असोज ३ बाट लिग खेल्न नसक्ने भन्दै ज्ञापनपत्र बुझाएका थिए ।
अक्टोबरको पहिलो साता साफ च्याम्पियनसिप आयोजना हुने सम्भावना भएकाले लिग पछाडि सारिएको हो । साफ आयोजनाको लागि नेपाल र माल्दिभ्सले दाबी पेश गरिसकेको छ ।
