३१ जेठ २०८३, आइतबार
लुम्बिनी प्रदेशका मुख्यमन्त्री शंकर पोखरेललाई हटाउन माग गर्दै विपक्षी गठबन्धनले प्रदेश प्रमुख अमिक शेरचनलाई बहुमत सांसदको हस्ताक्षर बुझाएको छ ।
पोखरेललाई हटाएर संविधानको धारा १६८ (२) बमोजिमको सरकार गठनका लागि आह्वान गर्न माग गर्दै विपक्षी गठबन्धनले हस्ताक्षर बुझाएको हो ।
नेपाली कांग्रेस, नेकपा (माओवादी केन्द्र), जसपा र राष्ट्रिय जनमोर्चाका सांसद प्रदेश प्रमुख कार्यालय पुगेर हस्ताक्षर बुझाएका हुन् ।
एमाले संसदीय दलका नेता पोखरेल संविधानको धारा १६८ को धारा १ अन्तर्गत मुख्यमन्त्री नियुक्त भएका थिए ।
पोखरेलले एकल बहुमतको हैसियत गुमाएको र गठबन्धनका रूपमा पनि बहुमतमा नरहेकाले नयाँ सरकार गठनको प्रक्रिया शुरू हुनुपर्ने विपक्षी गठबन्धनको जिकिर छ ।
विपक्षी गठबन्धनले माओवादी केन्द्रका कुलप्रसाद केसी स्वनामलाई मुख्यमन्त्री बनाउन प्रस्ताव गरेको छ । प्रदेश सभामा जसपाबाट कारवाहीमा परेका ३ सांसद्लाई नगन्दा ८० सदस्य छन् ।
यद्यपि कारवाहीमा परेका तीन सांसद सर्वोच्च अदालत जाने तयारीमा छन् ।
जसपाका ३ सांसद पदमुक्त भइसकेकाले ४१ सांसदले बहुमत पुग्ने विपक्षी गठबन्धनको जिकिर छ ।
