२४ जेठ २०८३, आइतबार
भारतको अमृतसरमा रहेको राजकीय मेडिकल कलेजले एक अनुसन्धानमा दाबी गरेअनुसार, कोरोना संक्रमितहरूको आँसुबाट पनि संक्रमण फैलिने सम्भावना हुन्छ ।
त्यसो त कोरोना फैलिने मुख्य स्रोत सास फेर्दा आउने साना ड्रपलेट नै हुन् । तर अध्येताहरूले अन्य माध्यमबाट पनि कोरोना फैलिने जोखिमलाई बेवास्ता गर्न नमिल्ने बताएका छन् ।
ओक्युलर मेनिफेस्टेसन्स अर्थात् कुनै रोगका कारण आँखामा पर्ने असर भएका व्यक्तिलाई कोभिड लागेको छ भने अन्यमा संक्रमण फैलिने जोखिम रहन्छ ।
कलेजले कुल १२० जना कोरोना रोगीमा अध्ययन गरेको थियो । तीमध्ये ६० लाई ओक्युलर मेनिफेस्टेसन्स थियो । कुल १२० मध्ये लगभग ३७ प्रतिशतलाई हलुका कोभिड संक्रमण थियो भने बाँकी ६३ प्रतिशतलाई गम्भीर संक्रमण भएको थियो ।
यस अध्ययनका लागि रोगीको आरटीपीसीआर रिपोर्ट आएको ४८ घन्टाभित्र आँसुको नमूना संकलन गरिएको थियो।
रोगीको स्याहार गर्ने मेडिकल स्टाफका लागि रोगीको आँसु संक्रमणको स्रोत हुन सक्ने भएकाले अध्ययनले सचेत गराएको हो । आँखा रोग विशेषज्ञहरूलाई बढी सचेत हुन भनिएको छ ।
