१० असार २०८३, बुधबार
टर्कीमा यस गर्मी महिनामा जंगलमा लागेको डढेलो अनियन्त्रित बनेपछि जनता आक्रोशित बनेका छन् ।
लगातार सात दिनसम्म भयानक डढेलोले देशको दक्षिण र पश्चिम क्षेत्र आक्रान्त छ ।
डढेलोमा परी दुईजना अग्निनियन्त्रकसँगै आठजनाको मृत्यु भएको छ । गत साताबाट टर्कीको भूमध्यसागर तटक्षेत्रमा लागेको आगोले जंगल र कृषियोग्य भूमि दुवैलाई ध्वस्त पारेको छ ।
३० वटा प्रान्तमा १३७ वटा आगो निभाइसकिएको भए पनि नौवटा आगो अझै बलिरहेका छन् । दश हजारभन्दा बढी मानिस अझै पनि क्षतिग्रस्त घरमा फर्किन सकेका छैनन् । पर्यटनको सीजन चलिरहेको बेलामा यस्तो विपत आइलागेको हो ।
चर्को हावा, कम आर्द्रता र उखरमाउलो गर्मीका कारण डढेलो झन् झन् दन्किरहेको हो । अर्को हप्तासम्म आगो बलिरहने र आगामी वर्षहरूमा पनि यसै हुने बताइएको छ ।
डढेलोको तापको राप टर्कीको अभिलेखमै अहिलेसम्मको चौथो सबभन्दा उच्च रहेको बताइएको छ ।
‘म पाँच दिनदेखि अधिकारीहरूसँग अनुनयविनय गरिरहेको छु,’ मार्मारिस शहर नजिक रहेको एक गाउँका चिन्तित बासिन्दाले बताए । उनको घर डढेलोले स्वाहा पारेको छ ।
‘यहाँ एउटा दमकल समेत थिएन । घर नजिक आगो आएपछि मद्दत गर्ने भन्छन् । अहिले घर नजिक आयो त आगो । यस्तो बेकामे सरकार कसरी टिकिरहेको छ ?’ उनले आक्रोश पोखे ।
‘अब अहिले आएर उनीहरू आफ्नो घर आफैं बनाऊ भन्दैछन् । सराप लागोस् उनीहरूलाई । अल्लाहको डर छ भने वा स्वविवेक छ भने उनीहरूले राजीनामा दिए हुन्छ ।’
टर्कीका विपक्षी दलहरूले राष्ट्रपति रेचेप तैयिप एर्दोआन विपत व्यवस्थापनमा पूरै चुकेको बताएका छन् ।
भूमध्यसागरका अन्य क्षेत्र लेबनन, ग्रीस, स्पेन र इटलीमा पनि डढेलो सल्किएका छन् ।
