प्रेमध्वज प्रधानको कालजयी गीत ‘पर लैजाऊ फूलहरू, छोपिदेऊ तारा जुन, बन्द गर गीतहरू, तिम्रो याद आउने सबै चीजहरू’ आज पनि उत्तिकै मर्मस्पर्शी लाग्छ । 

यही गीतको शैलीमा एमाले अध्यक्ष केपी शर्मा ओलीले आजको केन्द्रीय कमिटी बैठकमा आक्रोश पोखे ।

‘भत्काइदेऊ धरहरा, पुरिदेऊ रानी पोखरी, टालिदेऊ मेलम्ची, भत्काइदेऊ सडक पुल र विमानस्थलहरू, ओली याद आउने सबै चीजहरू,’ उनले भने । 

पुराना नियुक्तिहरू खारेज गर्ने, भूमिसम्बन्धी आयोग खारेज गर्नेलगायतका निर्णय सरकारले गरेको भन्दै उनले आपत्ति जनाएका हुन् । 

‘भूमिहीन र सुकुम्वासी समस्या समाधान आयोग खारेजीको निर्णय एउटा उदाहरण हो । पुराना सबै नियुक्ति खारेज गर्ने यसैको उदाहरण हो,’ उनले भने, ‘हामी शसक्त प्रतिपक्षको भूमिका खेल्छौँ । सडक र सदनमा सशक्त र प्रभावकारी भूमिका खेल्छौँ । सिँगौरी खेल्न आए सिङ भाँचिने छ ।’

उनले राष्ट्रको उपलब्धि वर्तमान सरकारलाई समस्या भएको बताए । ‘कालापानी, लिपुलेक र लिम्पियाधुरा समस्या भनेर पो आएछ नीति कार्यक्रममा बिचरा राष्ट्रको यत्रो उपलब्धि कम्फरटेबल गठबन्धनलाई समस्या भएछ,’ उनले भने । 

उनले एक महिनासम्म पनि मन्त्रिपरिषद् विस्तार हुन नसकेकाले देउवा सरकार परमादेशबाट बन्दै गरेको सरकार भएको बताए ।  ‘पार्टीको समस्याले सदन विघटन गर्न पाइन्छ ? भन्ने पार्टीहरूको किचलो छरपस्ट भएको छ  के अब आफ्नो पार्टी र गठबन्धनको समस्याका कारण राष्ट्रको समय बर्बाद गर्न पाइन्छ ?,’ उनले प्रश्न गरे ।