प्रहरी यूएन मिसनमा जाने पूर्व छनोट परीक्षा (प्री–स्याट) को प्रश्नपत्र बाहिरिएको घटनामा गठित छानबिन समितिले पुनः परीक्षा गर्न सिफारिस गरेको छ ।

शुक्रवार र शनिवार भएका परीक्षाका ४ वटै प्रश्नपत्र लीक भएको ठहर गर्दै समितिले पुनः परीक्षा गर्नुपर्ने सिफारिस गरेको हो ।

घटनामा २ प्रहरीलाई जागिरबाट बर्खास्त गरिने भएको छ । छानबिन समितिले तयार गरेको प्रतिवेदनअनुसार हवल्दार कुमार शाह र परिचर सुरेश बमलाई जागिरबाट बर्खास्त गर्न सिफारिस गरिएको छ । 

साइबर ब्यूरोमा कार्यरत हवल्दार शाहको योजनामा यूएन शाखामा कार्यरत परिचर बमलाई प्रयोग गरेको खुलेको थियो । 

यस्तै सो प्रकरणमा ३५ जनालाई कारबाही सिफारिस गरिएको छ । जसमध्ये अधिकांश अधिकृतस्तरका प्रहरी भएको स्रोतले जनाएको छ । 

प्रश्नपत्र बाहिर ल्याउन शाहले बमलाई दिएको एक लाख रूपैयाँ मिनाहा गरिदिएको छानविन समितिलाई बयान दिएका थिए । 

प्रश्नपत्र बाहिरिएको शंका लागेपछि एउटा सत्रको परीक्षा डेढ घण्टा ढिलो गरी शुरू भएको थियो । 

प्रश्नपत्र बाहिरिएपछि सत्यतथ्य छानबिन गर्न मंगलवार प्रहरी नायव महानिरीक्षक (डीआईजी) वसन्त लामाको नेतृत्वमा एसएसपी, एसपी, डीएसपी र इन्स्पेक्टरसहितको ६ जनाको टोली बनाएको थियो ।

युनाइटेड मिसनमा सुपरीवेक्षणको रूपमा जानको लागि लिइएको प्रहरीको आन्तरिक परीक्षा हो ।