काठमाडौं, २९ जेठ –अख्तियार दुरुपयोग अनुसन्धान आयोगले सोमवार एक नक्कली प्रमाणपत्रधारी वडा सचिवलाई नियन्त्रणमा लिएको छ । आयोगले चितवन जिल्लाको माडी नगरपालिको ७, ८ र ९ वडाको संयुक्त वडा कार्यालयका सचिव भानुभक्त आचार्यलाई शैक्षिक योग्यताको नक्कली प्रमाणपत्रसहित नियन्त्रणमा लिएको हो ।
आयोगले वडा सचिव आचार्यलाई नेपाल सरकारको एसएलसी बोर्डअन्तर्गत नन्दी माध्यमिक विद्यालय, नक्सालबाट प्रथम श्रेणीमा एसएलसी उत्तिर्ण गरेको नक्कली प्रमाणपत्र र भुटा विवरणसहित नियन्त्रणमा लिएको हो ।
आचार्यले सरकारी सेवामा बहाल रहने, बढुवा हुने र सो हैसियतले लाभ तथा सुविधा पाउने उद्देश्यले नक्कली प्रमाणपत्र लिएको अख्तियारले जनाएको छ ।
आचार्यलाई भ्रष्टाचार निवारण ऐन, २०५९ को दफा १६ को उपदफा १ बमोजिम सजाय हुन मागदाबी लिई सोमवारै विशेष अदालत काठमाण्डौंमा मुद्दा दायर गरिएको आयोगले जनाएको छ ।
