प्रहरी महानिरीक्षक (आईजीपी) शैलेश थापा क्षेत्रीले जिल्ला प्रहरी कार्यालय सुनसरीको परिसरमा नवनिर्मित कार्यालय, व्यारेक, कार्यालय प्रमुख निवास तथा सिनियर प्रहरी अधिकृत आवास भवनको बिहीवार आयोजित एक कार्यक्रमबीच उद्घाटन गरेका छन् ।

सो अवसरमा प्रहरी महानिरीक्षक थापा क्षेत्रीले भवन निर्माणमा सहयोग गर्ने पालिका प्रमुखहरुलाई सम्मानपत्र, उत्कृष्ट कार्य गर्ने प्रहरी तथा सहयोगीलाई प्रशंसापत्र र निर्माण व्यवसायीलाई कदरपत्र प्रदान गरेका थिए ।

कार्यक्रममा प्रहरी महानिरीक्षक थापा क्षेत्रीले नयाँ भवनको निर्माणमा संलग्न सम्पूर्णमा धन्यवाद दिँदै नयाँ भवनमार्फत जनताको आशा पनि बढेकाले प्रहरीले प्रदान गर्ने सेवाको गुणस्तरीयता बढाउनुपर्नेमा जोड दिए ।

गत वर्षभन्दा यस आर्थिक वर्षमा अपराध घटेको र प्रहरीले गर्ने कार्यलाई वस्तुगत एवं प्रविधियुक्त बनाउनुका साथै राजस्वमा वृद्धि, फरार प्रतिवादी पक्राउ र सफल मुद्दा लगायतका गतिविधिमा हरेक महिनाको अन्तमा मूल्यांकन गर्ने गरिएको चर्चा गर्दै प्रहरी महानिरीक्षक थापा क्षेत्रीले सुरक्षा जनता र प्रहरीको संयुक्त जिम्मेवारी भएकाले प्रहरीद्वारा सञ्चालित अपराध नियन्त्रण अभियानमा सहभागी हुन सबैमा अनुरोध समेत गरे ।

१ नम्बर प्रदेश प्रहरी कार्यालय विराटनगरका प्रमुख प्रहरी नायव महानिरीक्षक अरुणकुमार बिसीले धन्यवाद ज्ञापन गरेको कार्यक्रममा ईनरुवा नगरपालिकाका प्रमुख राजन मेहता र प्रमुख जिल्ला अधिकारी उमेशकुमार ढकालले शुभकामना मन्तव्य  व्यक्त गरेका थिए ।

कार्यक्रममा जिल्ला प्रहरी कार्यालय सुनसरीका प्रमुख संजय सिंह थापाले स्वागत मन्तव्य व्यक्त गरेका थिए भने प्रहरी निरीक्षक ई. नितिनकुमार लाखेले भवन निर्माण सम्बन्धी प्रतिवेदन प्रस्तुत गरेका थिए ।

नेपाल सरकारको नियमित बजेटबाट कूल ९ करोड ३६ लाख ६७ हजार १२० रुपैयाँ ७३ पैसाको लागतमा १६ कठ्ठा ५ धुर जग्गामा भवनको निर्माण कार्य सम्पन्न भएको हो । 

भवन उद्घाटन कार्यक्रम पश्चात प्रहरी महानिरीक्षक शैलेश थापा क्षेत्रीले जिल्ला प्रहरी कार्यालयमा सुनसरी तथा मातहत कार्यालयमा कार्यरत प्रहरी अधिकृत तथा जवानहरूलाई समसामयिक विषयमा आवश्यक निर्देशन समेत दिएका थिए ।