काठमाडौं, ३० जेठ- सत्तासाझेदार प्रमुख दल नेपाली कांग्रेस र नेकपा माओवादी केन्द्रले राष्ट्रिय जनता पार्टी नेपाल (राजपा) लाई चुनावमा सहभागी गराउन अझै प्रयास जारी राख्ने भएका छन् ।

निर्वाचनकै मुखमा राजपाले चुनाव सार्न माग गर्दै आन्दोलन घोषणा गरेको भोलिपल्ट प्रधानमन्त्री एवं कांग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहालबीच सोमबार भएको छलफलमा १४ असारको निर्वाचन पछि नसार्ने सर्तमा राजपाले उठाएका माग सम्बोधन गर्न सकिनेजतिमा लचकता अपनाएर अघि बढ्ने सहमति भएको खबर राजधानी दैनिकमा छ ।

देउवा र दाहालले १४ असारको निर्वाचन भने कुनै पनि सर्तमा पछि सार्न नसकिने तर उनीहरूले उठाएका मागमा अझै पनि सक्नेजतिमा लचकता अपनाएर पुनः वार्ता र सहमति गर्ने समझदारीसमेत गरेका छन् । प्रधानमन्त्री देउवाका सहयोगी भानु देउवाले राजपालाई निर्वाचनमा कसरी सहभागी गराउने भन्ने विषयमा छलफल भएको जानकारी दिए । दाहालका प्रेस सहयोगी मनोहरि तिमल्सिनाले १४ असारका निर्वाचन पछाडि नसार्ने गरी राजपालाई निर्वाचनमा सहभागी गराउन अझै छलफल गरेर जाने सहमति जुटेको बताए ।

यसअघि राजपाले निर्वाचनपछि संविधान संशोधन गर्न लिखित सम्झौता गर्नुपर्ने, स्थानीय तह वृद्धि गरेर कार्यान्वयन गर्नुपर्ने त्यसपछि मात्र निर्वाचनको वातावरण बन्ने भन्दै १४ असारको निर्वाचन मिति पछाडि सार्न माग गरेको थियो ।