०५ साउन २०८३, मंगलबार
अफगानिस्तानका राष्ट्रपति अशरफ गानीले अबको केही घन्टाभित्र राजीनामा दिन सक्ने अल अरेबिया पत्रिकाले स्रोतहरूलाई उद्धृत गर्दै दाबी गरेको छ ।
देशको गृह मन्त्रालयले लडाइँ नगरिकनै शक्ति हस्तान्तरण गर्ने बताएको छ ।
तालिबानले पनि काबुलमा हिंसा नगर्ने र कसैविरुद्ध पनि प्रतिशोध लिन नचाहेको बताएको छ । सरकार र सेनामा काम गरेका सबैलाई माफी दिने उसले दाबी गरेको छ ।
तालिबान लडाकूहरू काबुल आइपुगेपछि स्थानीयहरूले बैंकबाट धमाधम पैसा झिक्न थालेका छन् । बैंकमा पैसा सकिएपछि ढोका बन्द गरिएको थियो ।
अमेरिका, बेलायत र युरोपेली संघले आफ्ना कर्मचारीहरूलाई सुरक्षित स्थानतर्फ सारेका छन् । रुसले भने काबुलस्थित दूतावासबाट आफ्ना कर्मचारी अन्त नलग्ने बताएको छ ।
रुसको सरकारी समाचार संस्था तासमा आएको खबरअनुसार, तालिबानले रुसी दूतावासको सुरक्षाको प्रत्याभूति गरेको छ ।
