अफगानिस्तानमा तालिबानको नियन्त्रण कायम भएपछि मानिसहरूको भागाभाग चलिरहेको छ । 

काबुल विमानस्थलमा विशाल भीड भेला भएको छ । । विमानमा मानिसहरू झुण्डिएको दृश्य देखिएको छ । अमेरिकाको सैन्य विमानबाट एकजना मानिस खसेको पनि देखिएको छ । 

विमानबाट खसेका ती व्यक्ति १७ वर्षीय किशोर थिए । ती किशोर आफ्ना भाइसँग काबुल विमानस्थल पुगेका थिए । उनको शव परिवारले लगिसकेको छ र भाइको बारेमा केही थाहा हुन सकेको छैन । 

दाजुभाइले अफगानिस्तानबाट २० हजार मानिसलाई क्यानडा वा अमेरिका लगिने हल्ला सुनेका थिए । त्यसपछि सित्तैमा क्यानडा वा अमेरिका गएर सेटल हुन पाइने आशामा उनीहरू विमानस्थल पुगेका थिए । परिवारलाई नबताइकन उनीहरू त्यहाँ पुगेका थिए । 

अमेरिकाको सैन्य विमान सी–१७ काबुल विमानस्थलबाट उड्नका लागि गुड्दै गर्दा विमानमा विशाल भीड थियो । उक्त विमानबाट खसेर तीनजनाको मृत्यु भएको बताइएको छ । 

ती किशोरको परिवारका एक सदस्यले बताएअनुसार, उनलाई नयाँ नयाँ कपडा लगाउने, बक्सिङ गर्ने र सामाजिक सञ्जाल चलाउने सोख थियो । अरू मानिस जस्तै ती किशोर पनि तालिबान शासनदेखि डराएका थिए ।