२८ असार २०८३, आइतबार
अमेरिकी सांसदहरूको एक समूहले राष्ट्रपति जो बाइडनलाई पत्र लेखेर पाकिस्तानको आणविक हतियार तालिबानको हातमा पुग्न सक्ने विषयमा सचेत गराएका छन् ।
तालिबानले पाकिस्तानलाई अस्थिर बनाएर उसको आणविक हतियार हात पार्न सक्ने सांसदहरूको चिन्ता छ ।
अनि बाइडनले अफगानिस्तानको अव्यवस्थाका विषयमा उत्तर दिनुपर्ने पनि उनीहरूले बताएका छन् ।
अमेरिकी सिनेट र तल्लो सदनका ६८ जना सांसदले बुधवार बाइडनलाई पत्र लेखेका हुन् । तालिबानको शासनमा अफगानिस्तान आणविक शक्तिसम्पन्न राष्ट्र बन्ने हो कि भनी उनीहरूले चिन्ता व्यक्त गरेका छन् ।
बाइडन प्रशासनले अमेरिकालाई अघि बढाउनका लागि कस्तो योजना बनाइरहेको छ भनी उनीहरूले प्रश्न सोधेका छन् । अफगान वायुसेनामा तालिबानको नियन्त्रण कायम हुँदा के भन्छ भनेर पनि उनीहरूले सोधेका छन् । अनि तालिबानको हात परेको अमेरिकी हतियार फिर्ता लिने विषयमा के धारणा छ भनेर पनि उनीहरूले सोधेका छन् ।
रिपब्लिकन सांसद केभिन मककार्थीले बाइडनमाथि गम्भीर आरोप लगाउँदै राष्ट्रपतिले अमेरिकाका साथी तथा साझेदारविरुद्ध तालिबानको पक्ष लिएको आरोप लगाए । बाइडन प्रशासनको तालिबान नीतिका कारण अमेरिकाको प्रतिष्ठाको धज्जी उडेको उनले बताए । यस क्षतिबाट बाहिर निस्कन दशकौं लाग्ने उनको भनाइ छ ।
