०४ असार २०८३, बिहीबार
नेपाली कांग्रेसले पार्टीको १४औं महाधिवेशनको प्रक्रिया शुरू गर्न ३८ जिल्लामा निर्वाचन अधिकृत खटाएको छ ।
भदौ १८ गते गाउँपालिका तथा नगरपालिकाको वडास्तरको अधिवेशन शुरू गर्न पार्टीले क्रियाशील सदस्यताको छिनोफानो भएका जिल्लामा जिल्ला निर्वाचन अधिकृत खटाएको छ ।
पार्टीको केन्द्रीय निर्वाचन समितिका संयोजक कानुनविद् महादेव यादवले जिल्ला निर्वाचन अधिकृतहरू खटिएको जिल्लामा जाने क्रम शुरू भएको जानकारी दिए ।
पहिलो चरणमा हिमाली र पहाडी जिल्लामा निर्वाचन अधिकृत खटाइएको छ । हिमाली र दुर्गम जिल्लामा पुग्न केही दिन लाग्ने भएकाले पहिलो चरणमा निर्वाचन अधिकृत खटाइएको उनले बताए ।
निर्वाचन अधिकृतलाई क्रियाशील सदस्यताको नामावली, निर्वाचन निर्देशिका लगायतका निर्वाचनसँग सम्बद्ध सामग्री पठाइएको छ । काठमाडौं आसपासका जिल्ला र सुगम जिल्लामा भने १–२ दिनमा प्रतिनिधि खटाइने भएको छ ।
क्रियाशील सदस्यताको छिनोफानो भएपछि बाँकी जिल्लामा पनि प्रतिनिधि खटाइने जानकारी कांग्रेसले दिएको छ । पार्टीले क्रियाशील सदस्यतालाई अन्तिमरूप दिन समय लागे पनि छिनोफानो भएका जिल्लामा भने निर्वाचन प्रक्रिया शुरू गर्न निर्वाचन अधिकृत खटाइएको छ ।
सबै जिल्लामा भदौ १८ गते एकै चरणमा वडास्तरको अधिवेशन गरिने भए पनि प्रतिनिधि विभिन्न चरणमा खटाउनुपर्ने अवस्था रहेको जनाइएको छ । अब निर्धारित मितिमै पार्टीको महाधिवेशन गर्ने नै आफूहरूको उद्देश्य रहेको निर्वाचन समितिका संयोजक यादवले बताए ।
यसैबीच, पार्टीको निर्वाचन समितिले विभिन्न ४८ जिल्लाका क्रियाशील सदस्यताको विवरण वेबसाइटमा सार्वजनिक गरिएको जनाएको छ । निर्वाचन समितिका संयोजक यादवले हालसम्म क्रियाशीलको टुंगो लागेका ४८ जिल्लाका कायम रहेका सदस्यहरूको नामावली सार्वजनिक गरिएको जानकारी दिए ।
अब २९ जिल्लामा क्रियाशील सदस्यताको टुंगो लाग्न बाँकी छ । पार्टीले निर्वाचन समितिलाई सदस्यताको सूची उपलब्ध गराए पनि थप जिल्लाको समेत सार्वजनिक गरिने जनाइएको छ ।
अर्कोतर्फ क्रियाशील सदस्यताको नामावली सार्वजनिक गर्न माग गर्दै संस्थापन इतर पक्षका जिल्ला सभापतिहरूले विगत ३ दिनदेखि पार्टी कार्यालयमा शुरू गरेको रिले अनसन शुक्रवार पनि जारी रहेको नेपाली कांग्रेसका नुवाकोटका सभापति जगदीश्वरनरसिंह केसीले जानकारी दिए । गोरखापत्र दैनिकमा खबर छ ।
