२२ जेठ २०८३, शुक्रबार
गणतन्त्र कोरिया सरकारले नेपाल सरकारलाई ९४ थान अक्सिजन कन्सन्ट्रेटर हस्तान्तरण गरेको छ ।
कोरियाली अन्तर्राष्ट्रिय सहयोग नियोग (कोइका) मार्फत ३७८ थान अक्सिजन कन्सन्ट्रेटर नेपाललाई प्राप्त हुने भएको छ ।
स्वास्थ्य तथा जनसंख्या मन्त्रालयमा मंगलवार अपराह्न आयोजित एक संक्षिप्त कार्यक्रममा नेपालका लागि कोरियाका राजदूत पार्क चोङ सुकले स्वास्थ्य तथा जनसंख्या राज्यमन्त्री उमेश श्रेष्ठलाई ती उपकरण हस्तान्तरण गरे ।
आगामी १ महिनाभित्रमा बाँकी उपकरण नेपाल सरकारलाई हस्तान्तरण गरिने कोरियाली राजदूतावासले बताएको छ ।
कोभिडको महामारी विरुद्धको नेपाल सरकारको लडाइँमा सघाउन सहायतास्वरूप उपलब्ध गराइने ३७८ अक्सिजन कन्सन्ट्रेटरमध्ये स्वास्थ्य तथा जनसंख्या मन्त्रालयका अतिरिक्त, नेपाल–कोरिया मैत्री अस्पताल, त्रिशूली अस्पताल, काठमाडौं विश्वविद्यालय, धुलिखेल अस्पताल, टीकापुर र मुगु अस्पतालका निम्ति पनि ती उपकरण प्रदान गर्ने योजना रहेको दूतावासले जनाएको छ ।
मंगलवारै कोरियामा उच्च शिक्षा हासिल गरेका नेपालीको संगठन ‘कोइका कानले’ काभ्रेपलाञ्चोकस्थित मेथिनकोट अस्पताललाई ३ थान अक्सिजन कन्सन्ट्रेटर हस्तान्तरण गरेको छ ।
