लुम्बिनी प्रदेश सरकारका मुख्यमन्त्री कूलप्रसाद केसीले  सत्ता गठबन्धनको दल नेपाली कांग्रेसको भागमा रहेका मन्त्रालयको जिम्मेवारी पर्यटन, ग्रामीण तथा शहरी विकास मन्त्री डिल्ली चौधरीलाई दिएका छन् ।

मन्त्रिमण्डल विस्तारमा समय लागेपछि कांग्रेसको भागमा पर्ने अन्य ३ मन्त्रालय पनि मन्त्री चौधरीले नै हेर्ने गरी जिम्मेवारी प्रदान गरिएको छ । 

मन्त्रिमण्डल विस्तार नहुँदासम्मका लागि मुख्यमन्त्री केसीले ३ मन्त्रालयको जिम्मेवारी आफूलाई प्रदान गरेको मन्त्री चौधरीले बताए । उनका अनुसार ऊर्जा, जलस्रोत तथा सिँचाइ मन्त्रालय, वन, वातावरण तथा भू–संरक्षण मन्त्रालय र शिक्षा, विज्ञान, युवा तथा खेलकुद मन्त्रालयको जिम्मेवारी तत्कालका लागि चौधरीलाई प्रदान गरिएको छ ।

लुम्बिनीमा १५ सदस्यीय मन्त्रिमण्डल बनाउने तयारी छ । कांग्रेसबाट पाल्पाका वीरबहादुर राना, रूपन्देहीका बसिउद्धिन खाँ र बाँकेका सुरेन्द्र हमाललाई मन्त्री बनाउने चर्चा छ । 

नेपाली कांग्रेसले एक राज्य मन्त्रीसहित ४ जनालाई सरकारमा पढाउने तयारी गरेको छ । १ महिना हुनैलाग्दा समेत सरकारले मन्त्रिमण्डललाई पूर्णता दिन सकेको छैन । मन्त्रीका लागि कार्यकक्ष, कर्मचारी र सवारीसाधन व्यवस्थापन गर्न नसक्दा मन्त्रिपरिषद् विस्तार गर्न सकिएको छैन । मन्त्रालयको संख्या टुंगो लागे पनि सरकारका गतिविधि ठप्प छन् ।

८ महिना मात्र सरकार सञ्चालन गर्ने जिम्मा पाएका मुख्यमन्त्री केसीको १ महिना अलमलमै बितेको छ । प्रदेश सभाको बाँकी कार्यकालको ८/८ महिना नेतृत्व गर्ने कांग्रेस र माओवादीबीच सहमति छ ।