०९ साउन २०८३, शनिबार
अफगानिस्तानमा तालिबानले अन्तरिम सरकार गठन गरेपछि भारतको बिहारका पुरातत्त्ववेत्ता तथा अनुसन्धाताहरूले काबुल संग्रहालयमा रहेको बुद्धको भनिएको भिक्षापात्रको सुरक्षाका विषयमा चिन्ता व्यक्त गरेका छन् ।
भारतका प्रधानमन्त्री नरेन्द्र मोदीलाई सेप्टेम्बर ३ मा एक पत्र लेखेर अनुसन्धाता रञ्जित कुमारले भिक्षापात्र फिर्ता ल्याउनका लागि पहल गर्न आग्रह गरेका छन् । उनी वैशालीका दिवंगत सांसद रघुवंशप्रसाद सिंहका सहयोगी हुन् ।
बुद्धले भिक्षा माग्ने गरेको पात्र काबुल संग्रहालयमा रहेको विश्वास गरिन्छ । बुद्धले उक्त भिक्षापात्र वैशालीका जनतालाई दिएको सिंहले दाबी गर्ने गरेका थिए ।
सिंहले यस विषयमा सन् २०१० मा नै कुरा उठाएका थिए । भारतका तत्कालीन परराष्ट्रमन्त्री एसएम कृष्णले उक्त भिक्षापात्र कन्दहारमा पहिला राखिएको र पछि राष्ट्रपति नजीबुल्लाहको पालामा काबुल संग्रहालयमा राखिएको जानकारी दिएका थिए ।
आर्कियोलोजिकल सर्भे अफ इन्डियाका पूर्व क्षेत्रीय निर्देशक पीके मिश्राले सन् २०१४ मा काबुल भ्रमण गरेर उक्त भिक्षापात्रको अवलोकन गरेका थिए ।
उनले भने, ‘भिक्षापात्रमा ब्राह्मी लिपिमा अक्षर कुँदिएका छन् जसबाट त्यो बुद्धको समय भएको थाहा हुन्छ । भिक्षापात्र निकै ठूलो छ र बुद्धले आफ्नो जीवनकालमा भिक्षा माग्नका लागि यसलाई बनाएको हुनुपर्छ ।’
