३१ जेठ २०८३, आइतबार
एकजनाको ज्यान जोगाउने क्रममा मृत्यु भएका रुसका आपतकालीन मामिलामन्त्रीको अन्त्येष्टि समारोहमा राष्ट्रपति भ्लादिमिर पुटिन भावुक भएका छन् ।
येभ्गेनी जिनिचेभको कफिनमा पुटिनले दुईपटक शिर राखेका थिए । कफिनमा रुसको झण्डा बेरिएको थियो ।
त्यसपछि पुटिन येभ्गेनीकी पत्नी नताल्या र छोरा डेनिससँग अन्त्येष्टि समारोहमा सहभागी बनेका थिए । कफिनमा शिर राखेपछि पुटिन निकै निराश भएर हिँडेका थिए ।
जिनिचेभलाई गुमाउँदा आफूलाई अपूरणीय क्षति पुगेको पुटिनले बताएका छन् । जिनिचेभ अविश्वसनीय आन्तरिक शक्ति, सहास तथा वीरतायुक्त व्यक्ति भएको पुटिनले बताए ।
डकुमेन्टरी निर्माता अलेक्जेन्डर मेलनिकलाई बचाउने क्रममा जिनिचेभको ज्यान गएको हो । मेलनिक आर्कटिक क्षेत्रमा सैन्य अभ्यासको शूटिङ गर्ने क्रममा हिउँ जमेको पानीमा खसेका थिए ।
पुटिनले जिनिचेभलाई मरणोपरान्त हिरो अफ रसिया पुरस्कार दिएका छन् । त्यो रुसको सर्वोच्च सम्मान हो ।
जिनिचेभलाई पुटिनले आफ्नो उत्तराधिकारी बनाउनका लागि कोशिश गरेको विश्वास केही मानिसले गरेका थिए । पुटिनको शासनकालमा जिनिचेभको द्रुत गतिमा उदय भएको थियो । उनलाई क्रेमलिनको सुरक्षा परिषदमा शक्तिशाली भूमिका दिन खोजिएको थियो ।
