एक दिन गाउँपालिका हाँकेकी सुस्मिता भन्छिन्– नेतृत्व गर्न अवसर आयो भने पछि हट्दिनँ

उत्तम पोखरेल
उत्तम पोखरेल

पोखरेल लोकान्तर डट्कमका प्रदेश १ प्रतिनिधि हुन् ।

मोरङको बूढीगंगा गाउँपालिकामा १६ वर्षीया सुस्मिता ऋषिदेवले मंगलबार एक दिने अध्यक्ष बनेर गाउँपालिका सञ्चालन गरिन् । बालदिवसको अवसरमा गाउँपालिकाका अध्यक्ष बालचन्द्र माझीले एक दिनका लागि आर्थिक र प्रशासनिक बाहेकको अधिकार हस्तान्तरण गरेर सुस्मितालाई काम गर्ने अवसर प्रदान गरेका थिए ।


Advertisement

सुस्मिताले पनि आफूले पाएको अधिकारको भरपुर प्रयोग गरिन् । सुस्मिताले कर्मचारीलाई निर्देशन गर्नेदेखि कार्यपालिकाको बैठक समेत राखिन् । अध्यक्षको अधिकार के हो भनी प्रमुख प्रशासकीय अधिकृत डम्बर वल्लभ बरालसँग समेत उनले सोधेकी थिइन् । निर्वाचित जनप्रतिनिधि सहित बैठकमा बसेकी उनले गाउँपालिकाका कामलाई ढिलासुस्ती छिटो, छरितो र सहज रूपमा कसरी बनाउने भनेर छलफल समेत गरिन् ।
 उनले कर्मचारीहरूलाई काममा ढिला सुस्ती नगर्न समेत निर्देशन दिइन् । बैठकमा प्रमुख प्रशासकीय अधिकृत डम्बरुबल्लभ बरालले सहयोग गरेका थिए । बैठकपछि एकदिने अध्यक्ष सुस्मिताले स्वास्थ्य चौकी बुढीगंगा र कर्मवीर माध्यमिक विद्यालयको अनुगमन गरेकी थिइन् ।


Advertisement

स्वास्थ्य चौकी अनुगमन गर्दै उनले त्यहा आउने सेवाग्रहीलाई स्वास्थ्यचौकीले दिएको सेवा सुविधाको बिषयमा जिज्ञासा लिएकी थिइन् । उनले स्वास्थ्यकर्मीहरुलाई सेवाग्राहीलाई भरपर्दाे र सहज सेवा प्रदान गर्न निर्देशन दिइन् ।

कार्यपालिकाको बैठक बालबालिकासम्बन्धी कार्यक्रम सञ्चालनका लागि बाल क्लबले पेस गरेको प्रस्ताव उपर छलफल गरी ५० हजार बजेट निकासा दिने निर्णय समेत एक दिने अध्यक्षले गरेकी छिन् ।


Advertisement

बैठकमा उनले गाउँपालिकामा निर्माण हुने भौतिक संरचना बालमैत्री बनाउने, सन् २०२५ भित्र गाउँपालिकालाई बाल विवाहमुक्त गाउँपालिका घोषणाका लागि आजैबाट काम सञ्चालन गर्ने र लामो समयदेखि बन्द रहेको विद्यालय सञ्चालन गर्नका लागि गाउँपालिकाभरिका सबै विद्यालयमा सरसफाई अभियान सञ्चालन गरी सञ्चालनका लागि तयारी गर्ने निर्णय गरिन् ।

उक्त निर्णयपछि सुस्मिताले एक दिने अध्यक्षको जिम्मेवारी गाउपालिका अध्यक्ष माझीलाई हस्तान्तरण गरिन् । एक दिनका लागि भएपनि गाँउपालिकामा आउन पाउदा खुसी लागेको उनले बताइन् ।
उनले गरिबीको रेखामुनि रहेका बालबालिकालाई यसरी नै अगाडि बढाउन खोज्ने हो भने महिला पनि नेतृत्वमा आउन सक्ने बताइन् । उनले भनिन्, ‘अहिले पनि हाम्रो समाजमा बालविवाह बढ्दो अवस्थामा छ, त्यसलाई रोक्नु चुनौतिपूर्ण रहेको छ । आफूले कुनै जिम्मेबारी पाए नेतृत्व गर्न सक्छु भन्ने लागेको सुस्मितको भनाइ छ ।

बालबालिकाहरूलाई नेतृत्वमा ल्याउने उद्देश्यले एक दिनका लागि गाउँपालिका अध्यक्ष बनाउने कार्यक्रम सञ्चालन गरिएको राष्ट्रिय बाल अधिकार परिषद् प्रदेश १ का समन्वय अधिकृत सुमन अधिकारीले बताए । उनले बालबालिकामा नेतृत्व विकासको अभ्यास गराउनुका साथै राष्ट्रिय बाल दिवसलाई नेपालमा नै फरक र नवीन रूपमा मनाउने योजना अनुसार कार्यक्रम गरिएको बताए ।
गाउँपालिका अध्यक्ष माझीले बालिका सुस्मिताले गरेको तीन बुँदे निर्णय कार्यपालिको शुक्रवार बस्ने बैठकले अनुमोदन गरी कार्यान्वयन गर्ने बताए । बालिकासँग काम गर्न पाउँदा केही कुरा सिक्ने अवसर मिलेको प्रमुख प्रशासकीय अधिकृत  बरालले बताए ।

बालबालिका, किशोरी, महिला, विपन्न, दलित, सुकुम्वासीको गाउँपालिकाप्रतिको बुझाइ र अपेक्षाकोबारे जान्ने अवसर प्राप्त भएको गाउँपालिका अध्यक्ष माझीले बताए ।

उत्तम पोखरेल
उत्तम पोखरेल

लेखकबाट थप...

कमेन्ट गर्नुहोस्