उत्तर कोरियाले बुधवार दुईवटा ब्यालिस्टिक क्षेप्यास्त्र पूर्वी सागरमा खसाएको दक्षिण कोरियाका जोइन्ट चीफ्स अफ स्टाफले बताएका छन् । 

किसिम थाहा नभएका क्षेप्यास्त्रहरू उत्तरको मध्यभागबाट प्रक्षेपण गरिएको अनि दक्षिण कोरिया र अमेरिकाका गुप्तचर अधिकारीहरूले थप सूचनाका लागि विवरणहरूको विश्लेषण गरिरहेको बयान जारी गरेर बताइएको छ । 

ती क्षेप्यास्त्रहरूको उडान पथका बारेमा जानकारी आइसकेको छैन । 

उत्तरले यस वर्ष मात्र दोस्रोपटक ब्यालिस्टिक क्षेप्यास्त्र प्रक्षेपण गरेको हो । क्रुज क्षेप्यास्त्रलाई पनि जोड्ने हो भने यो वर्षको पाँचौं हतियार परीक्षण हो । आइतवार मात्र उत्तरले नयाँ किसिमको क्रुज क्षेप्यास्त्र प्रक्षेपण गरेको थियो । 

प्योङयाङले हालैका सातामा सैन्य तनाव चर्काएको छ । अघिल्लो महिना उसले दक्षिण कोरिया र अमेरिकाबीचको संयुक्त सैन्य अभ्यासको विरोध गर्दै ठूलै सुरक्षा संकट आउने चेतावनी दिएको थियो । 

उत्तरले योङब्योन परिसरमा प्लुटोनियम उत्पादन गर्ने आणविक भट्टी पनि फेरि शुरू गर्न खोजेको संकेत दिएको छ ।