०१ असार २०८३, सोमबार
नेकपा एमालेले बुटवलका मेयर शिवराज सुवेदीलाई मुक्का प्रहार गर्ने अनेरास्ववियुका सदस्य गणेश पंगेनीविरुद्ध मुद्दा नचलाउने भएको छ ।
एमाले बुटवलले मंगलवार पत्रकार सम्मेलन गरी घटना दुखद् र गलत भएको बताउँदै मुद्दा चलाउने पक्षमा एमाले नरहेको बताएको हो ।
एमाले बुटवल नगरका अध्यक्ष बाबुराम पन्थीले बुटवलको पहिरो प्रभावित ज्योतिनगरमा नगर प्रमुखमाथि भएको आक्रमणको निन्दा गरे । 'घटना जसरी भयो, त्यो गलत छ, तर यस घटनालाई मुद्दाका रूपमा अघि बढाउने पक्षमा हामी छैनौँ,' उनले भने । उनले घटना नियोजित रूपमा भएको आशंका रहेको बताए ।
नेकपा एमालेका जिल्ला अध्यक्ष समेत रहेका सुवेदीलाई आफ्नै कार्यकर्ताले मुक्का हानेपछि पार्टिभित्र पनि बहस सिर्जना गरेको छ । मेयर सुवेदीमाथिको आक्रमणलाई भने बुटवल उपमहानगरले नियोजित भएको भन्दै घटनामा संलग्नलाई कारवाहीको माग गरेको थियो ।
पहिरो निरीक्षणका लागि बुटवल-३ ज्योतिनगरमा गएका नगर प्रमुख सुवेदीलाई सोमवार पंगेनीले मुक्का प्रहार गरेका थिए ।
पंगेनीलाई साँझ ७ बजे नियन्त्रणमा लिएको इलाका प्रहरी कार्यालय बुटवलले जनाएको छ । ज्योतिनगरका स्थानीय समेत रहेका पंगेनीको पहिरो प्रभावित हुन् ।
