३१ जेठ २०८३, आइतबार
मानवअधिकारसम्बन्धी युरोपेली अदालतले बेलायतमा गरिएको अलेक्जेन्डर लिटभिनेन्कोको हत्यामा रुस दोषी रहेको ठहर गरेको छ ।
रुसका पूर्व गुप्तचर तथा सूचनादाता लिटभिनेन्कोलाई सन् २००६ मा विष दिइएपछि उनी तड्पी तड्पी मरेका थिए ।
लन्डनको मिलेनियम होटलमा उनले पिएको ग्रीन टीमा दुर्लभ तथा घातक रेडियो विकिरणयुक्त आइसोटोप वैज्ञानिकहरूले फेला पारेका थिए ।
मस्कोले उनको मृत्युमा हात रहेको कुरालाई अस्वीकार गर्दै आएको छ ।
तर मंगलवार रुसलाई युरोपको अदालतले दोषी ठहर गरेको छ ।
लिटभिनेन्को रुसका राष्ट्रपति भ्लादिमिर पुटिनका कठोर आलोचक थिए । विष खुवाएर मारिनुभन्दा ६ वर्षअघि उनी रुसबाट भागेर बेलायत पुगेका थिए ।
बेलायतले गरेको छानबिन सन् २०१६ मा टुंगिएको थियो । पुटिनले लिटभिनेन्कोको हत्याका लागि रुसी गुप्तचर कारवाहीको अनुमति दिएको हुन सक्ने उक्त छानबिनको निष्कर्ष छ ।
