चराचुरुङ्गी तथा वन्यजन्तु संरक्षणका लागि गुलेली संकलन अभियान

चराचुरुङ्गी वन्यजन्तु तथा तिनको वासस्थान संरक्षणका लागि गौरीशंकर संरक्षण क्षेत्र आयोजनाले गुलेली संकलन अभियान सञ्चालन गरेको छ ।


Advertisement

गौरीशंकर संरक्षण क्षेत्र आयोजनाले १४औं राष्ट्रिय संरक्षण दिवस २०७८ को अवसर पारेर चराचुङ्गी तथा वन्यजन्तुको संरक्षण गराउने उद्देश्यले गुलेली संकलन अभियान सञ्चालन गरेको हो । 


Advertisement

गौरीशंकर संरक्षण क्षेत्र आयोजना र प्रहरीले बिहीवार संयुक्त रूपमा दोलखाको उत्तरी क्षेत्र सिङ्गटी बजारमा गुलेली संकलन अभियान सञ्चालन गरेको छ । अभियानअन्तर्गत सो क्षेत्रबाट ३४ गुलेली र गुलेली बनाउन प्रयोग हुने ३७७ थान रबर संकलन गरेको छ । 

राष्ट्रिय प्राकृतिक संरक्षण कोष गौरीशंकर संरक्षण क्षेत्र आयोजनाले गाउँगाउँबाट गुलेली संकलनको लागि आयोजनाअन्तर्गतका संरक्षण क्षेत्र व्यवस्थापन समितिलाई खटाएको र गाउँगाउँमा समेत गुलेली संकलन भइरहेको संरक्षण क्षेत्रका सूचना अधिकारी तुलसीप्रसाद दाहालले बताए ।


Advertisement

अभियानअन्तर्गत गुलेली बुझाएर सहयोग गर्नेहरूलाई उचित मूल्यसमेत दिइने आयोजनाले जनाएको छ । गौरीशंकर संरक्षण क्षेत्रभित्र रहेका विभिन्न प्रजातिका चराचुङ्गी तथा वन्यजन्तुलाई संरक्षण गराउने उद्देश्यले  यो अभियान सञ्चालन गरिएको आयोजनाले जनाएको छ ।

गौरीशंकर हिमाललाई आधार बनाइ निर्माण गरिएको गैरीशंकर संरक्षण क्षेत्र दोलखा, रामेछाप र सिन्धुपाल्चोक गरी ३ जिल्लामा फैलिएको छ ।

संरक्षण क्षेत्रमा विभिन्न प्रजातिका चराचुङ्गी तथा वन्यजन्तुको बासस्थान रहेको पाइन्छ । चीनको सीमा तथा हिमाली क्षेत्रसँग जोडिएकाले यस संरक्षण क्षेत्रमा गतवर्ष संरक्षित वन्यजन्तु हिमचितुवा फेला परेको थियो ।

हिमचितुवा तथा अन्य संरक्षित वन्यजन्तु संरक्षण क्षेत्रमा रहेको हुँदा उनीहरुको संरक्षणको लागि आयोजनाले अभियान सञ्चालन गर्दै आएको छ । 

संरक्षित पक्षी सिकार गरी मारेमा वा घाइते बनाएमा १५ हजारदेखि ३० हजारसम्म जरिवाना वा ३ महिना देखि ९ महिनासम्म कैद वा दुवै सजाय हुने व्यवस्था छ । राष्ट्रिय निकुञ्ज, वन्यजन्तु आरक्ष, संरक्षण क्षेत्र वा मध्यवर्ती क्षेत्रभित्र अनुज्ञापत्र नलिइ संरक्षित पक्षीबाहेक अन्य पंक्षी शिकार गरी मारेमा वा घाइते बनाएमा २० हजारदेखि ५० हजारसम्म जरिवाना वा ६ महिनादेखि १ वर्षसम्म कैद वा दुवै सजाय व्यवस्था छ । 

कमेन्ट गर्नुहोस्