दाङमा ४५ वर्ष माथिका नागरिकलाई कोरोना विरुद्धको खोप लगाउने तयारी भएको छ ।

असोज ८, ९ र १० गते १० वटै स्थानीय तहमा ३० हजार ८२१ जनालाई भेरोसेल खोप लगाइने भएको छ । 

जिल्ला स्वास्थ्य कार्यालयका अनुसार घोराही, लमही, राप्ती, गढवा, बङ्गलाचुली र राजपुरमा असोज ८ र ९ गते खोप लगाइने छ । तुलसीपुर, शान्तिनगर, बबई र दङ्गीशरणमा असोज ९ र १० गते खोप लगाउने निर्णय भएको कार्यालय प्रमुख अङ्गदबहादुर शाहीले जानकारी दिए ।

घोराहीमा ८ हजार ८८१, तुलसीपुरमा ७ हजार ९८८, लमहीमा २ हजार ६८७, बङ्गलाचुलीमा १ हजार ३२३, बबईमा १ हजार ५११, दङ्गीशरणमा १ हजार १९७, गढवामा २ हजार १५८, राजपुरमा १ हजार ३८२, राप्तीमा २ हजार २८८ तथा शान्तिनगरमा १ हजार ४०६ जनालाई खोप लगाइने उनले बताए ।

‘४५ वर्षमाथिका र १२ कक्षाको परीक्षार्थीलाई खोप लगाइने छ,’ शाहीले भने । आगामी कात्तिक ५ र ६ गते कोरोना विरुद्धको खोपको दोस्रो मात्रा लगाउने जिल्ला कोरोना खोप समन्वय समिति तथा अनुगमन समितिले निर्णय गरेको छ ।