२० असार २०८३, शनिबार
एमालेले प्रथम विधान महाधिवेशन आयोजना गरिरहेको ललितपुरको गोदावरीस्थित सनराइज सम्मेलन केन्द्रको भाडा कति होला ? यो धेरैको जिज्ञासाको विषय हुन सक्छ ।
हुन पनि यो सम्मेलन केन्द्र नेपालमा भएको सबैभन्दा ठूलो क्षमताको हल हो । ललितपुरको गोदावरीमा ४३ रोपनी क्षेत्रफलमा फैलिएको यो सम्मेलन केन्द्रको मुख्य हलमा तीन हजार जना अट्ने क्षमता छ ।
मुख्य हलका बाहिरपट्टि रहेको दुई वटा सहायक हल छन् तर, त्यसमा मुख्य हलमा जस्तो कुर्सीको व्यवस्था गरिएको छैन । अहिले एमालेले ती दुई हलमा प्लास्टिकको कुर्सी राखेर महाधिवेशन प्रतिनिधिलाई सम्मेलनमा सहभागी गराएको छ ।
सनराइज सम्मेलन केन्द्र कूल १४३ रोपनी क्षेत्रफलमा बनाउने सरकारको निर्णय भए पनि अहिले सम्मेलन केन्द्रको कम्पाउण्ड भने ४३ रोपनी मात्रै रहेको अन्तर्राष्ट्रिय सम्मेलन केन्द्र विकास समितिले बताएको छ । यो समितिले अहिले व्यवस्थापन गरिरहेको बानेश्वरस्थित अन्तर्राष्ट्रिय सम्मेलनलाई संसद भवनको रुपमा सरकारलाई भाडामा दिइएको छ ।
गोदावरीको सनराइज सम्मेलन केन्द्र व्यवस्थापनको जिम्मा पनि अन्तर्राष्ट्रिय सम्मेलन केन्द्र विकास समितिलाई दिइएको छ ।
तत्कालीन प्रधानमन्त्री केपी शर्मा ओलीले उद्घाटन गरेको उक्त हलमा पहिलो र ठूलो कार्यक्रम पनि एमालेले नै आयोजना गरेको छ ।
असोज १५ देखि १७ सम्मको तीन दिनको लागि एमालेले सनराइज सम्मेलन केन्द्र भाडामा लिएको छ ।
अन्तर्राष्ट्रिय सम्मेलन केन्द्र विकास समितिले सनराइज सम्मेलन केन्द्रको सबै क्षेत्र भाडामा दिँदा एक दिनको भाडा पाँच लाख ६८ हजार रूपैयाँ तोकेको छ । यस हिसाबले एमालेको तीन दिन उक्त सम्मेलन केन्द्र भाडामा लिदाँ कुल १७ लाख चार हजार रूपैयाँ तिर्नुपर्ने अन्तर्राष्ट्रिय सम्मेलन केन्द्र विकास समितिका अधिकारीहरूले बताएका छन् ।
हल बुकिङ गर्दा शुरूमा २५ प्रतिशत धरौटी भुक्तानी गर्नुपर्ने र कार्यक्रम शुरू हुनुभन्दा अगाडि हलको सबै भाडा भुक्तानी गर्नुपर्ने कार्यविधि रहेको अन्तर्राष्ट्रिय सम्मेलन केन्द्र विकास समितिका एक अधिकारीले बताए ।
हल बुकिङ गर्दा भुक्तानी गरिएको २५ प्रतिशत धरौटी रकम भने कार्यक्रम सम्पन्न भएपछि मात्रै फिर्ता हुने व्यवस्था छ ।
‘हलमा कुनै क्षति भयो भने धरौटी रकम जफत हुन्छ । क्षति नभएको यकिन भएपछि धरौटी बापतको रकम फिर्ता गर्छौं,’ समितिका ती अधिकारीले भने ।
धरौटी र तीन दिनको हलको भाडा बापतको रकमसहित एमालेले कुल २१ लाख ३० हजार रूपैयाँको चेक अन्तर्राष्ट्रिय सम्मेलन केन्द्र विकास समितिलाई बुझाइसकेको छ ।
एमालेले हलको तीन दिनको भाडा १७ लाख चार हजार रूपैयाँ तिरेको छ भने धरौटीका लागि चार लाख २६ हजार रूपैयाँ बुझाएको छ । कार्यक्रम सम्पन्न भएपछि हलमा कुनै क्षति नभएको पाइएमा धरौटीबापतको चार लाख २६ हजार भने फिर्ता हुन्छ ।
कार्यक्रमको सन्दर्भमा सम्मेलन केन्द्रभित्र क्षति भएको पाइएमा उक्त क्षतिको मूल्यांकन गरी त्यसबापतको रकम कटौती गरेर बाँकी रकम फिर्ता हुने अन्तर्राष्ट्रिय सम्मेलन केन्द्र विकास समितिका अधिकारीहरूले बताए ।
सनराइज सम्मेलन केन्द्रको उद्घाटन गरिएको भए पनि एमालेले कार्यक्रम आयोजना गर्दा हलको सबै तयारी पूरा भएको थिएन । एमालेले कार्यक्रम आयोजना गर्ने भएपछि हलमा बाँकी रहेको काम हतार–हतार सम्पन्न गरिएको थियो ।
हलको स्टेजमा सोफा, हलको विद्युत, पानी, साउन्ड सिस्टमसहितको व्यवस्था भने अन्तर्राष्ट्रिय सम्मेलन केन्द्र विकास समितिले गरेको छ । कार्यक्रमको लागि आवश्यक अन्य व्यवस्थापन भने एमालेको विधान महाधिवेशन व्यवस्थापन मूल समितिले गरेको छ ।
