नेपाली कांग्रेसका सहमहामन्त्री डा. प्रकाशशरण महत नेतृत्वको टोलीले भारतीय सत्तारुढ दल भारतीय जनता पार्टी (भाजपा) अध्यक्ष जगत प्रकाश (जेपी) नाड्डासँग भेटवार्ता गरेका छन् । दुइ पार्टीको सम्बन्ध सुधारका लागि भन्दै पूर्व परराष्ट्रमन्त्री महतको नेतृत्वमा कांग्रेस नेताहरु बिहीवार दिल्ली गएका थिए ।

दिल्ली गएकै दिन कांग्रेस नेताहरुले भाजपा अध्यक्षसँग भेटवार्ता गरेका हुन् । दुइ पार्टीबीचको सम्बन्धलाई प्रगाढ बनाउने विषयमा छलफल भएको भाजपाले सामाजिक सञ्जाल ट्वीटरमा सन्देश लेखेको छ ।
भेटमा गत महिना नेपाल भ्रमणमा आएका भाजपाका विदेश विभाग इन्चार्ज डा. विजय चौथाइवाले पनि सहभागि थिए । ‘अध्यक्ष नाड्डाले भारत र नेपालको सम्बन्ध अझ सुदृढ बनाउन जोड दिनुभयो’ बिजेपीको आधिकारिक ट्वीटर ह्याण्डलमा लेखिएको छ ।

महतसँगै पूर्वअर्थराज्य मन्त्री उदय शमशेर जबरा र वीरगञ्जका पूर्व सांसद एवं कांग्रेस केन्द्रीय सदस्य अजय चौरसिया ‘बरै’ पनि सहभागी छन् । सरकारको नेतृत्व सम्हाले पछि कांग्रेसले भारतसँगको सम्बन्धलाई थप मजबुत बनाउन खोजेको छ ।