२८ जेठ २०८३, बिहीबार
कांग्रेस सभापति शेरबहादुर देउवाले प्रधानमन्त्री पदको शपथ लिएको झण्डै तीन महिनापछि मन्त्रिपरिषद्ले पूर्णता पाउने भएको छ । शुक्रवार मन्त्रिपरिषद् विस्तार गर्ने र सकभर आजै मन्त्रीहरूलाई शपथ गराउने तयारी रहेको बालुवाटार स्रोतले जानकारी दियो ।
सत्तारुढ गठबन्धनबीच बिहीवार मन्त्रालय भागबण्डामा सहमति भएको थियो । मन्त्रालय भागबण्डामा सहमति भएसँगै दलहरू मन्त्री छान्न व्यस्त भएका छन् ।
नेकपा (माओवादी केन्द्र)ले सरकारमा सहभागी हुने मन्त्रीको नाम प्रधानमन्त्री देउवालाई बुझाइसकेको छ ।
माओवादीले देवेन्द्र पौडेल, शशी श्रेष्ठ, महेश्वर गहतराजलाई मन्त्री र बोधमाया यादवलाई राज्यमन्त्री बनाउन सिफारिश गरेको छ । नेकपा (एस)ले पनि मन्त्रीहरूको सम्भावित नाममा टुंगो लगाएको छ ।
शहरी विकास मन्त्रालयमा विरोध खतिवडा र स्वास्थ्य तथा जनसंख्या मन्त्रालयमा रामकुमारी झाँक्रीलाई सिफारिश गर्न लागिएको नेकपा ((एस) स्रोतले बतायो । प्रेम आले र किशान श्रेष्ठ पनि मन्त्री बन्नेको सूचीमा छन् । मन्त्रीको नाम छान्न नेकपा (एस)को सचिवालय बैठक बस्दैछ ।
जनता समाजवादी पार्टी (जसपा)ले महेन्द्र यादव, राजेन्द्र श्रेष्ठ, इस्तियाक राई लगायतलाई मन्त्री बनाउँदैछ । तर, मन्त्री छान्ने जिम्मा उपेन्द्र यादवलाई दिएको छ । सरकारमा उपप्रधानमन्त्री नराख्ने सहमतिपछि उपेन्द्र भने यसपटक सरकारमा सहभागी नहुने भएका छन् ।
सरकारको नेतृत्वकर्ता दल नेपाली कांग्रेसले पाउने बाँकी मन्त्रालयमा पठाउनको नाम तय भइसकेको छैन । वरिष्ठ नेता रामचन्द्र पौडेललाई दुई र कृष्ण सिटौलालाई एक मन्त्रीको नाम दिन प्रधानमन्त्रीले आग्रह गरेका थिए । सिटौलाले उमाकान्त चौधरीको नाम सिफारिश गरेको स्रोतको भनाइ छ ।
३ मन्त्री मागेको पौडेल पक्षले मीनेन्द्र रिजाल, सुजाता कोइराला, तेजुलाल चौधरी र दीलेन्द्र बडूलाई मन्त्री बनाउने चर्चा छ । कानून मन्त्रालय सम्हालिरहेका सरकारका प्रवक्ता ज्ञानेन्द्रबहादुर कार्कीलाई सञ्चार मन्त्रालयको जिम्मा दिने तयारी रहेको कांग्रेस स्रोतले बतायो ।
असार २९ गते प्रधानमन्त्रीको शपथ लिएलगत्तै देउवाले ४ जना मन्त्री समावेश गरेर सानो आकारको मन्त्रिमण्डल बनाएका थिए । साउनमा एक राज्यमन्त्री र असोजमा एक मन्त्री थपिएका थिए । देउवाले प्रधानमन्त्रीको शपथ लिएको ८७ दिन पुगेको छ ।
