मोरङको धनपालथान गाउँपालिका–४ कर्सिया बीपी चोकस्थित सिटिजन्स बैंकमा असोज २५ गते अपराह्न ३ः४५ बजे २१ लाख ७० हजार रुपैयाँ लुटपाट घटनामा संलग्न भई पक्राउ परेका ३ जनालाई बुधवार प्रहरीले सार्वजनिक गरेको छ ।

जिल्ला प्रहरी कार्यालय मोरङमा आयोजित पत्रकार सम्मेलनमा घटनाका मुख्य योजनाकार नेपाली नागरिक विराटनगर महानगरपालिका–८ का ३२ वर्षीय श्याम मुखिया, भारतको अररिया सेखपुरा–५ का २८ वर्षीय सुनिल यादव र भारत अररिया गाराहा–४ का ३० वर्षीय विजय सहनी (गोली लागेर घाइते)लाई सार्वजनिक गरिएको छ ।

लुटपाटपछि घाइते सहनीलाई को२५प ३८९९ नम्बरको मोटरसाइकलको बीचमा राखी भारततर्फ भाग्ने क्रममा मोरङको धनपालथान–२ खयरबना चोकबाट स्थानीयको सहयोगमा प्रहरीले १५ मिनेटको अवधिमा पक्राउ गरेको हो । 

यादव भारत फरार भइसकेको अवस्थामा गोली लागेर घाइते भएका सहनीलाई लिन टेम्पोमा आएर पुनः मोटरसाइकलमा जाने क्रममा प्रहरीले पक्राउ गरेको हो । लुटपाटमा ९ जना संलग्न रहेकामा ७ जना बैंकमा प्रवेश गरेका, १ जना बाहिर बसेको र अन्य १ जना नदेखिने पाराले बसेको जिल्ला प्रहरी कार्यालय मोरङका प्रमुख प्रहरी उपरीक्षक जनार्दन जिसीले बताए ।

लुटपाटमा संलग्न ६ जना भारततर्फ फरार रहेको आशंका गरिएको र चाँडै पक्राउ गरी सार्वजनिक गरिने उनले बताए । आरोपीहरूले विगत केही दिनदेखि बैंकको अनुगमन गर्नुका साथै भीडभाड नभएको समय हेरी लुटपाट गरेको प्रहरी नायब उपरीक्षक (डीएसपी) श्याम श्रेष्ठले बताए ।

लुटपाटको प्रतिरोध गर्ने क्रममा बैंकका सुरक्षा गार्ड शीतल कुमाल गोली लागेर घाइते भएका र विराटनगरको एक निजी अस्पतालमा उपचार भइरहेको छ । निजहरूको साथबाट कटुवा पेस्तोल १ (लोडेड गोलीसहित), सानो मोबाइल १, पेस्तोलको नपड्किएको राउन्ड १ र खोका १ बरामद गरिएको छ ।

बैंकले प्रारम्भिकरूपमा २१ लाख ७० हजार रुपैयाँ लुटपाट भएको जनाए पनि लिखितरूपमा अहिलेसम्म विवरण नपठाएको पत्रकार सम्मेलनमा जानकारी गराइयो ।

होजियारी उद्योग सञ्चालन गरेका मुख्य योजनाकारका रूपमा रहेका मुखियाले चाँडै पैसा कमाउने उद्देश्य राखेका थिए भने सहनी र यादव भारतका पेशेवर अपराधी हुन् । निजहरू उपर हातहतियार खरखजना, डकैती, संगठित अपराध तथा ज्यान मार्ने उद्योग गरी ४ वटा मुद्दा दर्ता गरिने प्रहरीले जनाएको छ ।