२२ जेठ २०८३, शुक्रबार
झापाको कचनकवल गाउँपालिका–३ स्थित एक माछा पोखरीमा अज्ञात समूहले विष हालेपछि माछा मर्न थालेका छन् ।
सक्षम युवा कृषि फर्मको माछा पोखरीमा अज्ञात समूहले विष हालेपछि माछा मर्न थालेको कृषि फर्मका सञ्चालक बुद्धिप्रसाद गौतमले जानकारी दिए ।
‘४ दिनयता माछा मरिरहेका छन्,’ गौतमले भने, ‘कुखुराको आन्द्रा भुँडीमा विष हालेर पोखरीमा हालिएको भेटियो, मरेका माछाले कुखुराको भुँडी खाएको भेटियो ।’
गत सोमवारदेखि माछा मर्न थालेका उनको भनाइ छ । करीब आधा किलो तौल भएको माछा उनले केही दिन अघिदेखि मात्र बिक्री गर्न थालेका थिए ।
‘सोमवार ८/१० वटा माछा मरेको भेट्यौं,’ उनले भने, ‘त्यसको भोलिपल्ट मंगलवार ५० वटा जति, बुधवार एक क्वीन्टल र आज २ क्विन्टल जति मरेका माछा पोखरीबाट निकाल्यौं ।’
पोखरीमा १० हजार माछाको भुरा हालेको उनको भनाइ छ । पोखरीमा हालिएको विषका कारण करीब १० क्वीन्टल माछा मर्ने र सोबाट ३ लाखभन्दा बढी घाटा हुने उनले बताए । पोखरीमा कसले विष हाल्यो भन्ने यकिन नभएको उनले बताए ।
मरेका माछा प्रहरीको सल्लाहमा आफूले खाल्डो खनेर पुरेको उनले बताए ।
सक्षम युवा कृषि फर्म दर्ता गरेर विक्रम संवत् २०७२ सालदेखि ४ बिघा १५ कठ्ठा क्षेत्रफलमा माछा, बाख्रा र राँगा पालन गर्दै आएको सञ्चालक गौतमले बताए ।
पोखरीमा विष हालिएको विषयमा उनले प्रहरी चौकी पथरियामा समेत निवेदन दिएका छन् । निवेदनपछि आफूहरूले घटनास्थलको निरीक्षण गरेको प्रहरी चौकीका प्रमुख प्रहरी सहायक निरीक्षक सुरेशकुमार शेर्माले बताए । ‘माछा मरेको छ,’ उनले भने, ‘अनुसन्धान गर्दैछौं ।’
