२२ जेठ २०८३, शुक्रबार
बलिउड अभिनेता शाहरुख खानका छोरा आर्यन खान उतिबेला लागूऔषधि सम्बन्धी मुद्दामा जेलमा रहेका छन्, रिहाइका लागि अपिल गरिएपनि अदालतले उनलाई जमानत दिएको छैन ।
बिहीवारको आदेशअनुसार आगामी ५ दिन अदालत बन्द रहने भएकाले आर्यनले कम्तिमा २० अक्टोबरसम्म जेलमै बस्नुपर्ने भएको छ ।
जेलको स्रोतलाई उदृत गर्दै भारतीय सञ्चारमाध्यममा प्रकाशित समाचारअनुसार आर्यनलाई जेलको खाना मन परिरहेको छैन । आर्यन जेलभित्र हैरान छन् । जेलभित्र सहज नभएका कारण आर्यन अधिकांश समय तनाव र हैरान देखिने गरेका छन् ।
जेल स्रोतले भन्यो, ‘जेलभित्र घुलमिल हुन समय लाग्छ, जेलभित्रको दुनियाँ अलग्गै हुन्छ ।’ आर्यनसँगै पक्राउ परेका अन्य व्यक्तिलाई सुरक्षाको कारण देखाउँदै छुट्टाछुट्टै राखिँदा उनी एक्लै परेका छन् । आर्यनसँगै ६ आरोपी पक्राउ परेका थिए ।
पक्राउ परेपछि आर्यनको क्वारेन्टीन अवधि १३ अक्टोबरमा पूरा भएको छ । सबै आरोपीको पीसीआर रिपोर्ट नेगेटिभ आएको जनाइएको छ ।
