२२ जेठ २०८३, शुक्रबार
डोटी जिल्लाको केआईसिंह गाउँपालिका–७ भूमिराजमाडौंका बेसाहारा बालबालिकालाई एमटीएस नामक गैरसरकारी संस्थाले राहत वितरण गरेको छ ।
बुवाको मृत्यु भएपछि आमाको स्वास्थ्य अवस्था बिग्रेर सहाराविहीन बनेका ३ बालबालिकालाई संस्थाले राहत वितरण गरेको हो ।
करीब ६ वर्ष पहिले बुवा रणबहादुर नेपालीको मृत्यु भएपछि उनीहरूका आमाको अवस्था पनि नाजुक बनेपछि छोराछोरीहरू १० वर्षीया खञ्जरी, ६ वर्षीया गच्ची र ३ वर्षीय पारस नेपाली विचल्लीमा परेका छन् ।
दशैंको समयमा पनि खाद्यान्न नहुँदा ३ बालबालिकालाई समस्या भएको जानकारी पाएपछि आफूहरूले राहतका लागि खाद्यान्न तथा लगाउनका लागि लुगाकपडा वितरण गरेको संस्थाका जिल्ला संयोजक डबलबहादुर बमले बताए । संस्थाले ५० किलो चामल, दाल, नून, तेल, साबुन र न्यानो लुगा सहितका सामग्री वितरण गरेको वडाध्यक्ष हर्कबहादुर विष्टले जानकारी दिए ।
