काठमाडौं, १६ पुस– राज्यका लागि महत्वपूर्ण सूचना संकलन गर्न भर्ना भएका राष्ट्रिय अनुसन्धान विभाग (गुप्तचर) का कर्मचारीहरु हाकिमको घरमा घरेलु कामदारको रुपमा काम गर्दै आएको आजको नयाँ पत्रिका दैनिकमा खबर छापिएको छ ।
सरकारी जनशक्तिको चरम दुरुपयोग गर्दै विभागका हाकिमहरुले गुप्तचरहरुलाई आफ्नो व्यक्तिगत कामदार बनाउँदा संगठन नै कमजोर बन्न पुगेको छ ।
नियमअनुसार विभागका कर्मचारीलाई सूचना संकलन बाहेक अन्य कुनै काममा पठाउन नपाइने प्रावधान छ । तर, सोर्सफेर्स र दबाबको भरमा उनीहरुलाई हाकिमको घरमा कामदारका रुपमा खटाइने गरिएको हो ।
विभागको प्रमुखबाट देविराम शर्माले अवकाश पाएको आठ वर्ष भइसकेको छ । तर उनको घरमा विभागका कर्मचारी रामनाग चौधरी घरेलु कामदारका रुपमा कार्यरत छन् । चौधरीजस्तै धेरै कर्मचारी हाकिमको घरमा भाग पकाउँदै आएको समेत समाचारमा उल्लेख छ ।